بیلتنگڈی : ندی کے پانی میں زہر کی وجہ سے 4بچے ہوگئے بیمار۔ علاج کے لئے اسپتال میں داخل
بیلتنگڈی22؍مارچ (ایس او نیوز) ساوانالو گاؤں میں پھالگنی ندی کے پانی میں مچھلیوں کے شکار کے لئے کچھ شرپسندوں نے زہر ملادیا تھا ۔ اسی پانی کو پاس کے مکان والوں نے کھانا پکانے کے لئے استعمال کیا جس کی وجہ سے چار بچوں کی طبیعت خراب ہوگئی اور انہیں علاج کے لئے اسپتال میں داخل کیاگیا ہے۔
بتایا جاتا ہے کہ مچھلیوں کاشکار کرنے کے لئے کچھ لوگوں نے ندی میں توتیا(کوپرسلفیٹ) ملادیاتھا جو زہریلا مادہ ہوتا ہے۔ اسی زہریلے پانی سے تیار کیاگیا کھانا بچوں کے بیمار ہونے کا سبب بن گیا ۔ ان متاثرہ بچوں کو منگلورو کے وینلاک اسپتال میں داخل کیاگیا ہے ، لیکن ندی کنارے رہنے والے لوگوں نے ابھی تک اس تعلق سے پولیس میں باقاعدہ شکایت درج نہیں کروائی ہے،کیونکہ جو شرپسند ندی میں زہر ملاکر مچھلی کا شکارکرنے میں ملوث ہیں ، وہ بڑے دبنگ قسم کے لوگ ہیں اور مقامی افراد ان سے خوف کھاتے ہیں۔
سرکل پولیس انسپکٹر سندیش پی جی نے جائے واردات پر پہنچ کر معائنہ کیا اور مزید تحقیقات جاری ہے۔
