بیلتھنگڈی12؍نومبر (ایس او نیوز) گوری پال کراس پر سڑک کنارے نالے میں ایک نامعلوم شخص کی لاش برآمد ہوئی ہے جس کے بارے میں شبہ کیا جارہا ہے کہ اسے کسی او رمقام پر قتل کرنے کے بعد لاش کوموٹرگاڑی میں اس جگہ لاکر پھینکا گیا ہے۔

موصولہ رپورٹ کے مطابق انیل پرکاش ڈیسوزا نامی ایک مقامی شخص نے صبح چہل قدمی کے وقت سڑکے کنارے لاش دیکھنے کے بعد پولیس کو مطلع کیا۔ سرکل پولیس انسپکٹر سندیش پی جی، سب انسپکٹر روی بی ایس اور دیگر عملے نے موقع پر پہنچ کر معائنہ کیا اور لاش کو اپنے قبضے میں لینے کے بعد پوسٹ مارٹم کے لئے ڈیرلکٹے اسپتال میں منتقل کیا۔

معلوم ہوا ہے کہ لاش کے جسم پر کسی بھی قسم کے زخموں کے نشان موجود نہیں ہیں۔ البتہ چہرے پر پلاسٹک ٹیپ چپکانے کے آثار پائے گئے ہیں۔ جس سے سمجھا جارہا ہے کہ اس کا دم گھونٹ کر ہلاک کیاگیا ہے۔ لاش کے جسم پر ایسا کوئی نشان یا علامت بھی موجود نہیں ہے جس سے اس شخص کی شناخت معلوم ہوسکے۔ پولیس کا کہنا ہے کہ اس کے قاتلوں نے اس کے پاس پرس، موبائل فون، شناختی کارڈ، ڈرائیونگ لائسنس جیسی پہچاننے لائق کوئی چیز نہیں چھوڑی ہے۔