بیلتھنگڈی: بیف کی غیر قانونی سپلائی۔ڈی سی آئی بی نے کیا 850کیلو گرام گوشت ضبط۔ 5افراد گرفتار
بیلتھنگڈی17؍اپریل(ایس او نیوز) غیر قانونی طور پر بیف سپلائی کے دو واقعات میں ڈسٹرکٹ کرائم انٹلی جنس برانچ نے چھاپہ مارکر 850کیلو گرام گوشت موٹر گاڑیاں ضبط کرنے کے علاوہ پانچ افراد کو گرفتارکرلیا ہے۔ضبط شدہ اشیاء کی قیمت کا اندازہ14.25لاکھ روپے لگایا گیا ہے۔
موصولہ رپورٹ کے مطابق ڈی سی آئی بی کی ٹیم جب پٹرولنگ کی ڈیوٹی پر تھی تو صبح 4بجے مہیندرا ژایلو کار کی تلاشی لینے پر انہیں کار کے اندرتقریباً 450کیلو گرام گوشت دستیاب ہوا جو غیر قانونی طور پر رفت کیا جارہا تھا۔پولیس افسران نے گوشت اور گاڑی کو ضبط کرنے کے ساتھ کار میں موجودمشتاق(50سال)، محمد کبیر (38سال)، عبدالجبار (45سال) کو گرفتار کرلیا۔
ایک اور معاملے میں ڈی سی آئی بی ٹیم نے جب مہیندرا بولیرو کی تلاشی لی گئی تو اس میں بھی غیر قانونی طور پر لداہوا 400کیلو گرام گوشت برآمدہوا۔یہاں پر بھی گوشت اور گاڑی کو ضبط کرنے کے ساتھ اس میں موجود ایم اشرف (39سال) اور رمیض (25سال) کو گرفتارکرلیا گیا۔دونوں معاملات میں ملزمین اورضبط شدہ موٹر گاڑیاں متعلقہ پولیس اسٹیشن کے حوالے کی گئیں اور عدالت سے اجازت لینے کے بعد گوشت کو زمین میں دفن کردیا گیا۔
ضلع پولیس سپرنٹنڈنٹ روی کانتے گوڈا کی نگرانی میں انجام دی گئی اس کارروائی میں ڈی سی آئی بی پولیس انسپکٹرسنیل وائی نائک اور دیگر عملے نے حصہ لیا۔