اینڈوسلفان کے متاثرین کی بھوک ہڑتال
بیلتھنگڈی 28؍مئی (ایس او نیوز) باغات اور فصلوں کی حفاظت کے لئے کچھ برسوں قبل جن علاقوں میں اینڈوسلفان نامی دوا کا چھڑکاؤ کیا گیا تھا اس سے جسمانی طور پر بری طرح متاثرین ہونے والوں کی حالت زار دیکھ کر کسی کا بھی دل پسیج جائے گا۔ لیکن ان متاثرہ معصوم بچوں، بوڑھوں او ر مرد و خواتین کا کہنا ہے کہ حکومت ان کے ساتھ ہمدردانہ رویہ نہیں اپنا رہی ہے اور ان کے لئے مناسب معاوضہ فراہم نہیں کررہی ہے۔
اینڈو سلفان سے ہونے والی اپنی جسمانی معذوری اور اس کی پیچیدگیوں کی طرف توجہ دلانے اور سرکار سے اپنے مطالبات پورے کروانے کی نیت سے اب ان متاثرین نے کوکاڈا میں بھوک ہڑتال کے ساتھ احتجاجی مظاہرہ کیا ہے۔ان کا اہم مطالبہ یہ ہے کہ کیرالہ کی حکومت نے ایسے متاثرین کو امداد فراہم کرنے کا جوسسٹم لاگو کیا ہے ، اسی طرز پر حکومت کرناٹکا بھی منصوبہ بندی کرے اور ان متاثرین کی بازآدکاری کا پروگرام وضع کرے۔
مطالبات کی طرف دھیان دلانے کے لئے متاثرین کوبھوک ہڑتال پر بٹھانے کا پروگرام Kokkada Endosulfan Action Committee
نے بنایا ہے۔جس میں درجنوں متاثرخاندانوں نے حصہ لیا ہے۔ دوسری طرف اس مظاہرے میں بی جے پی نے بھی اپنی موجود گی درج کرواتے ہوئے اس مسئلے کو صحیح طریقے سے حل نہ کرنے پر حکومت کی سرزنش کی ہے۔ایم پی نلین کمار کٹیل نے ہڑتالی متاثرین سے خطاب کرتے ہوئے کہا کہ ریاستی حکومت اس معاملے میں بے پروائی کا مظاہرہ کررہی ہے۔ کم ازکم اب تواسے ہوش میںآنا چاہیے۔ انہوں نے آئندہ پارلیمانی سیشن میں اس مسئلے کو اٹھانے کا بھی وعدہ کیا۔اس کے علاوہ بی جے پی کے دیگر لیڈروں اور عوامی نمائندوں اور سنگھ پریوار کی دوسری تنظیموں نے بھی احتجاج کے مقام پر پہنچ کر اپنی حمایت کا اعلان کیا ہے۔
کوکاڈا اینڈوسلفان ایکشن کمیٹی کے صدرسریدھر گوڈا کا کہنا ہے کہ حکومت اینڈو سلفان متاثرین کی زندگیوں سے کھیل رہی ہے۔ جب یو ٹی قادر وزیر صحت کے منصب پر تھے تو انہوں نے اس مسئلے کو کیرالہ سے بھی بہتر انداز میں حل کرنے کا وعدہ کیا تھا، مگر آج تک ہمارا مسئلہ جو ں کا توں پڑا ہوا ہے۔اسی لئے ہمیں احتجاج اور بھوک ہڑتال کی راہ اپنانی پڑی ہے۔اگر ہمارے مطالبات حکومت پورے نہیں کرتی ہے تو پھرسب لوگ اسی مقام پر موت تک بھوک ہڑتال پر بیٹھ جائیں گے۔
سوُلیا کے ایم ایل اے مسٹر ایس انگارا نے اس موقع پر وعدہ کیا کہ وہ اس مسئلے کو آئندہ اسمبلی اجلاس میں اٹھائیں گے۔جبکہ ایم ایل سی کوٹا سرینواس پجاری نے کہا کہ ان متاثرین کی حالت دیکھ کر انہیں بہت دکھ ہواہے اور وہ اس مسئلے کو کاونسل کے اجلاس میں اٹھائیں گے۔
ایڈیشنل کمشنر، ڈسٹرکٹ ہیلتھ افیسر اور دیگر سرکاری افسران نے احتجاجی بھوک ہڑتال کے مقام پرپہنچ کر حالات کا جائزہ لیا اور مظاہرین سے گفت و شنید کی۔ اس مظاہرے میں 2000کے قریب عوام اور 500سے زیادہ اینڈو سلفان متاثرین نے حصہ لیا۔