بیلتھنگڈی میں آر ٹی آئی کارکن پر انڈیلا گیا ابلتا ہواپانی
بیلتھنگڈی5؍دسمبر(ایس او نیوز)سرکاری ہاؤسنگ اسکیم میں ہوئی بدعنوانیوں کے خلاف شکایت کرنے والے آر ٹی آئی اکٹیوسٹ پر ایک خاتون نے ابلتاہوا پانی انڈیل دیا جس کی وجہ سے زخمی آر ٹی آئی کارکن کو اسپتال میں داخل کرنا پڑا ۔
موصولہ رپورٹ کے مطابق اجیرے کے رہنے والے بالا سبرامنیا بھٹ نامی آر ٹی آئی اکٹیوسٹ نے جس اسکیم میں بدعنوانی کی شکایت درج کروائی تھی ، اس کی جانچ کے لئے سرکاری افسران بھٹ کو اپنے ساتھ لے کر ملے بٹّو نامی مقام پر معائنے کے لئے گئے ہوئے تھے ۔بالاسبرامنیا بھٹ نے راجیو گاندھی ہاؤسنگ کارپوریشن کے پاس جو شکایت درج کروائی تھی اس کے مطابق سرکار کی طرف سے شروع کی گئی ’بسوا ہاؤسنگ اسکیم‘ کے تحت اجیرے گرام پنچایت کی نائب صدر وینوتا کے نام گھر منظور کیا گیا تھا۔اور وینوتا نے اسے منظور کیے گئے سائز سے بہت زیادہ بڑا مکان اس اسکیم کے تحت تعمیر کروایا تھا۔
ہاؤسنگ کارپوریشن نے اس شکایت پر تحقیقات کرنے کی ذمہ داری تعلقہ پنچایت ایکزیکٹیو آفیسر کو دی تھی۔جس کے بعد تحقیقاتی ٹیم اپنے ساتھ سبرامنیا بھٹ کو لے کر مذکور ہ مقام پر پہنچی تو مبینہ طور پر وینوتا نے ابلتا ہوا پانی سبرامنیا پر پھینک دیا۔
اس تعلق سے جب تعلقہ پنچایت کے سی ای او سے دریافت کیا گیا تو انہوں نے گول مول سا جواب دیتے ہوئے کہا کہ چونکہ افسران آگے نکل چکے تھے اس لئے حقیقی طورپر کیا بات ہوئی انہیں معلوم نہیں ہے۔ البتہ وینوتا نے مکان کے منظور شدہ نقشے سے زیادہ علاقے میں تعمیری کام انجام دینے کے امکانات موجود ہیں۔
پتہ چلا ہے کہ پولیس افسران نے اسپتال پہنچ کر بالاسبرامنیا بھٹ سے ملاقات کی اور واقعے کی تمام تفصیلات معلوم کیں۔
