بیلاری 22؍فروری (ایس او نیوز) یہاں پر کوٹوریشورارتھ اتسوا کے دوران65فٹ اونچا رتھ گرنے کا واقعہ پیش آیا جس میں درجنوں بھکتوں کے زخمی ہونے کا خدشہ ظاہر کیا گیا ہے۔بعض ذرائع کے مطابق کم از کم چھ سے زیادہ افراد شدید زخمی ہوئے ہیں، کچھ نے یہ تعداد ۳۰ کے قریب بتائی ہے، البتہ کسی کی ہلاکت کی کوئی خبر نہیں ملی ہے۔

رتھ کے گرتے ہی مجمع میں دہشت اور افراتفری کا ماحول پیدا ہوگیا۔رپورٹ کے مطابق حادثہ اس وقت پیش آیا جب مندر کے سالانہ تہوار کے موقع پر خوبصورتی کے ساتھ سجایا ہوا رتھ سڑک سے گزارتے ہوئے اس کے اپنے اصلی مقام کی طرف لے جایا جارہا تھا۔رتھ الٹ کر گرنے کی وجوہات کے بارے میں ابھی کوئی حتمی بات معلوم نہیں ہوئی ہے، مگر شبہ ظاہر کیا جارہا ہے کہ رتھ کا ایک پہیہ ٹوٹ جانے سے رتھ الٹ کر مجمع پر گر گیا۔ یہ رتھ اتسواشمالی کرناٹکا کے اہم ترین تہوار میں شامل ہے جہاں ہزاروں کی تعدادمیں بھکت جمع ہوتے ہیں۔حادثے کے بعد مجمع پر قابو پانے اور زخمیوں کوباہر نکالنے کے کام میں مصروف رضاکاروں اور پولیس کے لئے کافی مشکلات کا سامنا کرنا پڑا ۔ اس کے علاوہ احتیاطی تدبیر کے طور پررتھ کھینچتے وقت جو بجلی کاٹ دی جاتی ہے اس سے بھی ریلیف کے کام میں بڑی رکاوٹ پیدا ہوئی۔ بہت سارے زخمیوں کو مختلف اسپتالوں میں داخل کردیا گیا ہے۔جبکہ معمولی طور پر زخمی ہونے والوں کو علاج کے بعد گھر بھیج دیا گیا ہے۔ڈپٹی کمشنر رام پرساتھ منوہر اورہوسپیٹ کے اسسٹنٹ کمشنر ریلیف کے کام کی نگرانی کررہے ہیں۔