بیگوسرائے،09؍ ستمبر (ایس او نیوز؍آئی این ایس انڈیا) بیگو سرائے ماب لنچگ کیس میں پولیس نے ایف آئی آردرج کی ہے۔تین مجرموں کا پیٹ پیٹ کر قتل کرنے کے الزام میں پولیس نے 6 افراد کے خلاف نامزدگی اور 150 نامعلوم افراد کے خلاف ایف آئی آر درج کی ہے۔
بیگو سرائے کے SP آدتیہ کمار نے کہاہے کہ وہ اس پورے معاملے کی تحقیقات کر رہے ہیں اور پولیس کے پاس جو موبائل ویڈیوز فوٹیج دستیاب ہیں،ان کی بنیاد پر لنچنگ کے واقعہ میں ملوث افراد کی شناخت کی جا رہی ہے۔موبائل ویڈیو فوٹیج میں لوگوں کی شناخت کرنے کے بعد ہی پولیس نے دیر رات 6 لوگوں کے خلاف نامزد اور 150 نامعلوم افراد کے خلاف ایف آئی آردرج کی ہے۔
غور طلب ہے کہ آدتیہ کمار نے اس بات کی تصدیق کی تھی کہ جمعہ کو جب بیگو سرائے کے نارائن پپر گاؤں میں واقع نوسرجت پرائمری اسکول میں 3 ہتھیار بند مجرم ایک سکول کو اغوا کرنے کی منشا سے پہنچے تھے تو مقامی لوگوں نے ان تینوں مجرموں کا پیٹ پیٹ کر قتل کر دیاہے۔
ایس پی نے بتایا کہ جس وقت ماب لنچگ کے اس واقعہ میں ان تین مجرموں کو پیٹ کر مارا گیا اس دوران موقع پر تقریباََ5000 لوگ موجودتھے۔غور طلب ہے کہ ماب لنچنگ کے اس واقعہ میں جمعہ کو مکیش مہتو، ہیرے سنگھ اور شیام سنگھ نام کے تین بدنام مجرموں کا بھیڑ نے پیٹ کر قتل کر دیا تھا۔