مایاوتی نے مودی پر سادھا نشانا،کہا:مودی کا پاکستان کو مشورہ ، دوسروں کو نصیحت، خود کی فضیحت کے مترادف
لکھنؤ، 25؍ستمبر(ایس او نیوز ؍آئی این ایس انڈیا )بی ایس پی سپریمو مایاوتی نے وزیر اعظم نریندر مودی کی طرف سے پاکستان کو دی گئی نصیحتوں پر طنز کستے ہوئے آج کہا کہ پاکستان کے بارے میں کی گئی بیان بازی ’دوسروں کو نصیحت، خود کی فضیحت‘کے محاورہ کو ثابت کرتی ہے۔مایاوتی نے یہاں نامہ نگاروں سے کہاکہ حیرت کی بات یہ ہے کہ سرحد پار سے مسلسل ہو رہے دہشت گردانہ حملوں سے ہو رہے جان ومال کے بھاری نقصان کو روک پانے کی ناکامیوں کو چھپانے اور اپنی کمزوریوں سے لوگوں کی توجہ بٹانے کے لیے اب پاکستان کو غربت، بے روزگاری اور ناخواندگی کے خلاف جنگ لڑنے کا مشورہ دیا جا رہا ہے۔انہوں نے کہاکہ ساتھ ہی اس بارے میں پاکستانی عوام کو بھی مشورہ دیا جا رہا ہے جبکہ ان کی یہ بیان بازی واقعی دوسروں کو نصیحت، خود کی فضیحت کے مشہور محاورے کو ثابت کرتی ہے۔مایاوتی نے کہا کہ پاکستانی حکومت اور وہاں کی عوام کو مشورہ دینے سے پہلے وزیر اعظم نریندر مودی کو اپنے گریبان میں جھانک کر دیکھنا چاہیے کہ ان کی آخری ڈھائی سال کی حکومت کے دوران غربت، مہنگائی، بے روزگاری، ناخواندگی کے ساتھ ساتھ عوامی مفاد اور عوامی فلاح و بہبود کے معاملے میں بھی ان کا ریکارڈ بہت زیادہ خراب رہا ہے۔