سری نگر،17؍جون(ایس او نیوز) رمضان کےمقدس مہینے میں جموں وکشمیر میں دہشت گردوں نے اغوا کرنے کے بعد فوج کے جوان اورنگ زیب کا قتل کردیا ۔ ہفتہ کو اورنگ زیب کی موت سے پہلے کا ایک مبینہ ویڈیو سوشل میڈیا پر جاری کیا گیا ، جس  میں فوجی جوان سے پوچھ گچھ کی جارہی ہے۔

ویڈیو میں مشتبہ حزب المجاہدین دہشت گرد ، جس نے نیلی جنس اور ٹی شرٹ پہن رکھی ہے ، وہ اورنگ زیب سے ان کی ڈیوٹی ، پوسٹنگ اور انکاونٹر کے بارے میں پوچھ گچھ کرتا ہوا نظر آرہا ہے۔ تقریبا ڈیڑھ منٹ کے اس ویڈیو کو شاید جنگل کے پاس بنایا گیا ہے۔

ہفتہ کی دوپہر کو ہی پونچھ کے سلانی گاوں میں شہید اورنگ زیب کو سپرد خاک کیا گیا ، جہاں مقامی لوگوں نے شہید اورنگ زیب کے نعرے بھی لگائے۔ خیال رہے کہ عید کی چھٹی منانے جارہے اورنگ زیب کو دہشت گردوں نے جمعرات کی دو پہر کو اغوا کرلیا تھا اور پھر بعد میں گولیوں سے چھلنی جوان کی لاش پلوامہ ضلع کے گوسو علاقہ میں ملی ۔ ان کے سر ، چہرے اور گردن پر گولیوں کے نشانات ملے۔

ملک کیلئے شہید ہوئے اورنگ زیب کے گھر میں عید سے پہلے ہی ماتم چھاگیا۔ ان کی والدہ نے کہا کہ وہ اپنے بیٹے کے ساتھ عید منانا چاہتی تھیں ، لیکن دہشت گردوں نے اورنگ زیب کی صرف لاش ہی چھوڑی۔

فوج سے ریٹائر اورنگ زیب کے والد محمد حنیف نے کہا کہ ان کے بیٹے نے اپنا وعدہ پورا کیا اور اپنی گردن کٹاکر میرا بیٹا میرے پاس واپس آگیا ، لیکن میرا ایک اور بیٹا ابھی بھی ہندوستانی فوج میں ہے۔

انہوں نے کہا کہ آج خوشی کا تہوار تھا جو غم میں بدل گیا ، میرے بیٹے کو موت کے گھاٹ اتار دیاگیا ، جس کا غم میں تنہا نہیں منارہا ، بلکہ پورا ہندوستان یہ غم منارہا ہے۔