بنگلورو،26؍مئی(ایس او نیوز) برہت بنگلور مہانگر پالیکے کو اثاثہ ٹیکس کی ادائیگی کیلئے چند برس قبل شروع کی گئی خود اندازہ لگائے اسکیم کے تحت شہر میں مختلف بڑی بڑی املاک کے مالکان نے بی بی ایم پی کو غلط اطلاعات فراہم کرکے ٹیکس چوری کرنے کی جو کوشش کی ہے اسے بے نقاب کرنے کیلئے آج سے برہت بنگلور مہانگر پالیکے کی ٹیکس اینڈ فائنانس کمیٹی نے ان املاک کا از نو سروے کرنا شروع کردیا۔کمیٹی کے چیرمین ایم کے گنا شیکھر کی قیادت میں کارپوریٹروں نے آج صبح مہادیو پورہ ڈویژن میں آنے والے فینکس مال سے اس سروے کی شروعات کی۔ جدید ترین لیز تھری ڈی آلات کی مدد سے اس مال کے سروے کا کام شروع ہوا۔اس پر مامور کارکنوں نے بتایاکہ دو دن کے اندر اس مال کے سروے کا کام مکمل ہوگا جس کے بعد یہ پتہ چلے گا کہ فینکس مال کے مالکان نے کتنے ٹیکس کی چوری کی ہے ۔انہوں نے کہاکہ سروے کے بعد اگر یہ بات سامنے آئی کہ اس مال کے مالکان نے ٹیکس کی چوری کی ہے توان کے خلاف قانونی کارروائی کی جائے گی۔ بی بی ایم پی کو بڑے پیمانے پر ٹیکس کے معاملے میں دھوکہ دینے کے واقعات کو دیکھتے ہوئے اس سروے کاکام شروع کیاگیا ہے۔ انہوں نے کہاکہ پہلے مرحلے میں تھری ڈی ٹیکنالوجی استعمال کی جارہی ہے اگلے مراحل میں اور بھی جدید ٹیکنالوجی کا استعمال کرکے ٹیکس کی چوریوں کو بے نقاب کیا جائے گا۔ مہادیو پورہ میں آنے والے ایچ وی آر مال ، زیلو کمپنی اور دیگر اہم آئی ٹی بی ٹی کمپنیوں کا بھی سروے کرکے اثاثے کی مکمل تفصیلات یکجا کی جائیں گی۔مرحلہ وار شہر کے تمام مالس اور تجارتی عمارتوں کا تھری ڈی اور فور ڈی سروے کیا جائے گا اور بعد میں ان کی طرف سے کی جارہی دھوکہ دہی سے بی بی ایم پی کو کتنا خسارہ ہورہاہے اس کا اندازہ لگاکر اس کے مطابق اثاثہ ٹیکس کی وصولی کی جائے گی۔گنا شیکھر نے بتایاکہ شہر میں 55 شاپنگ مالس ہیں ، 70 سے زائد ٹیک پارک ہیں۔ ان تمام کا سروے تین ماہ کے اندر مکمل کرکے رپورٹ پیش کرنے کی ہدایت دی گئی ہے۔ رپورٹ ملنے کے بعد ان کے مالکان سے سختی کے ساتھ اثاثہ ٹیکس وصول کیاجائے گا اور قانونی چارہ جوئی بھی کی جائے گی۔