پارکنگ مقامات پر تحفظ کے سلسلہ میں غور کرنے بی بی ایم پی کا اجلاس
بنگلورو،27؍فروری(ایس او نیوز) پچھلے ہفتہ کے دن شہر میں منعقدہ ایرو انڈیا شو کے دوران کار پارکنگ کے مقام پر جو خوفناک آگ حادثہ پیش آیا تھا جس میں تین سو سے زیادہ کاریں تباہ ہو کر رہ گئیں اس حادثہ کے بعد شہر کے مختلف مقامات پر جہاں گاڑیوں کی پارکنگ کا انتظام ہے ان کے تحفظ کا جائزہ لینے کے لئے کل گذشتہ شہر کی مےئر گنگامبکے ملیکارجن نے بروہت بنگلورو مہا نگرا پالیکے (بی بی ایم پی) کے صدر دفتر میں ایک مذاکراتی اجلاس منعقد کیا تھا ، جس میں اس بات پر بھی غور کیا گیا کہ اس طرح کے ہنگامی حالات میں ان پر قابو پانے کے سلسلہ میں قبل از وقت کیا انتظامات کئے جا سکتے ہیں۔شہر کی مےئر نے بی بی ایم پی افسران کو ہدایت دی ہے کہ وہ شہر کے تمام علاقوں میں موجود قانونی اور غیر قانونی پارکنگ مقامات کی تعداد سے متعلق تمام تفصیلات انہیں پیش کریں اور اس بات کی وضاحت ہو کہ ان مقامات پر آگ حادثات اور دوسرے ہنگامی حالات کا مقابلہ کرنے اور ان سے حفاظت کے سلسلہ میں کیا احتیاطی اقدامات کئے گئے ہیں، انہوں نے ان مقامات پر بھی حفاظتی انتظامات سے متعلق تفصیلات فراہم کرنے کی ہدایت دی ہے جہاں بی بی ایم پی کی گاڑیاں روکی جاتی ہیں۔