بی بی ایم پی میں تمام کی نظریں اب اسٹانڈنگ کمیٹیوں کے انتخاب پر،کونسل کے لیڈر کاعہدہ حاصل کرنے کیلئے گنا شیکھر پیش پیش
بنگلورو29؍ستمبر(ایس او نیوز)برہت بنگلور مہانگر پالیکے کے میئر اور ڈپٹی میئر کے انتخاب کے بعد تمام کارپوریٹروں کی نظریں اب اسٹانڈنگ کمیٹیوں کی چیرمین شپ پر ٹکی ہوئی ہیں۔ حکمران پارٹی میں جہاں ایک کارپوریٹر کو کونسل کا لیڈر منتخب کیاجائے گا، وہیں کانگریس پارٹی چار اسٹانڈنگ کمیٹیوں کی چیرمین شپ بھی حاصل کرے گی۔جنتادل (ایس) کے چار کارپوریٹروں کواسٹانڈنگ کمیٹی چیرمین شپ ملے گی، جبکہ چار آزاد کارپوریٹرس بھی چیرمین شپ حاصل کریں گے۔کونسل میں لیڈر کے عہدہ کیلئے جئے محل کے کارپوریٹر ایم کے گنا شیکھر کا نام سب سے آگے ہے، ان کے علاوہ گروپن پالیہ کے رضوان نواب، پلکیشی نگر کے اے آر ذاکر اور دیور جیون ہلی کے سمپت راج بھی اس عہدہ کے دعویداروں میں شامل ہیں۔اگلے ماہ ہونے والے اسٹانڈنگ کمیٹی کے انتخابات میں ان تمام کے متعلق فیصلہ لیا جائے گا۔ بی جے پی سے اپوزیشن لیڈر کا عہدہ حاصل کرنے کیلئے امیش شٹی، این ناگراجو ، منجوناتھ راج، پورنیما سرینواس وغیرہ کوشش کررہے ہیں۔ عنقریب بی جے پی لیڈروں کی ایک میٹنگ میں طے کیا جائے گا کہ بی بی ایم پی میں اپوزیشن لیڈر کون ہوگا۔ بارہ اسٹانڈنگ کمیٹیوں میں سے کانگریس ، جے ڈی ایس اور آزاد کو چار چار کمیٹیاں تقسیم ہوئی ہیں۔ جنتادل (ایس) نے مانگ کی ہے کہ اسے چاروں اہم کمیٹیاں ٹاؤن پلاننگ، ہیلتھ، ورکس ، اور اکاؤنٹس دے دی جائیں۔ کانگریس نے چار کمیٹیاں اپنے پاس رکھ کر باقی چار کمیٹیاں آزاد کارپوریٹروں کو دینے کا فیصلہ کیا ہے۔6 اکتوبر کو ہونے والی کونسل میٹنگ میں ان تمام کمیٹیوں کا انتخاب عمل میں آئے گا۔