بنگلورو9 ؍دسمبر(ایس او نیوز) بروہت بنگلور مہانگر پالیکے( بی بی ایم پی) کونسل اجلاس کے دوران کارپوریٹروں کے مسائل پر متعلقہ اسٹانڈنگ کمیٹیوں کے صدور کی لاپروائی اور جواب نہ دینے پر ان کیخلاف کارروائی کرنے کے لئے وزیر اعلیٰ سدارامیا نے بی بی ایم پی کو سخت تاکید کی ہے، وزیر اعلیٰ نے کہا ہے کہ بی بی ایم پی اسٹانڈنگ کمیٹیوں کے صدور منتخب ہونے کے بعد انہیں کس طرح کی بات کرنی چاہئے، اس کے متعلق ان کو کوئی بھی جانکاری نہیں رہتی ہے، ان کی کیا ذمہ داریاں ہیں اس سے بھی وہ واقف نہیں رہتے، جس کی وجہ سے متعلقہ افسران کی جانب سے سوالات کے جوابات تیار کرکے دیئے جاتے ہیں، لیکن متعلقہ اسٹانڈنگ کمیٹیوں کے صدور اس سے ان کا کوئی تعلق نہ رہنے کا بہانہ بناکر اپنی ذمہ داری سے منہ موڑ لیتے ہیں، اس لئے اب آئندہ بی بی ایم پی کونسل اجلاس کی کارروائی کے دوران اسٹانڈنگ کمیٹیوں کے صدور کو باقاعدہ طور پر پوچھے گئے سوال پر جواب دینے کی ہدایت دی گئی ہے، اس سلسلہ میں حقوق اطلاعات کے مرکز کے منیجنگ ٹرسٹی امریش نے وزیر اعلیٰ کو ایک مکتوب روانہ کرکے بی بی ایم پی اسٹانڈنگ کمیٹی کے صدور سے کونسل اجلاس کے دوران پوچھے گئے سوالات کے جوابات دینے کے لئے ہدایت دیں، اس سلسلہ میں وزیر اعلیٰ نے شہری ترقیات محکمہ سے کہا ہے کہ وزیر اعلیٰ کے ڈپٹی سکریٹری ارون پور ٹوڈو نے بی بی ایم پی کو ایک مکتوب روانہ کرتے ہوئے کہا ہے کہ اب آئندہ کارپوریٹروں کے مسائل پر اسٹانڈنگ کمیٹیوں کے صدور کو جواب دینے کے لئے ضروری اقدامات کرنے کا حکم دیاہے، گزشتہ تین برسوں سے بی بی ایم پی کے12 اسٹانڈنگ کمیٹیوں کے صدور منتخب ہورہے ہیں،ان میں سے چند ہی اپنی ذمہ داری سے واقف ہیں، دیگر افراد کو اپنی ذمہ داریوں کے متعلق کسی بھی طرح کی جانکاری نہیں ہے، لیکن اب وزیر اعلیٰ کی سخت تاکید پر تمام اسٹانڈنگ کمیٹیوں کے صدور کو تمام تفصیلات اور جانکاری حاصل کرنا لازمی ہوچکا ہے۔