بنگلورو،14؍جنوری(ایس او نیوز ) بروہت بنگلورو مہا نگرا پالیکے (بی بی ایم پی) نے ریاستی حکومت کی خدمت میں ایک تجویز روانہ کی ہے جس میں آئندہ لوک سبھا انتخابات سے قبل ریاستی وزیر اعلیٰ کی طرف سے پیش کئے جانے والے ریاستی بجٹ میں بلدیہ کے لئے کل 4,611 کروڑ روپئے کا مالی تعاون فراہم کرنے کا مطالبہ پیش کیا گیا ہے۔مذکورہ تجویز کے مطابق 2,918 کروڑ روپئے سڑکوں کی مرمت کے علاوہ شہری حدود میں نئی سڑکوں کی تعمیر اور موجودہ سڑکوں کی تجدید و ترقی کے لئے طلب کئے گئے ہیں۔بنگلور ترقیاتی انتظامیہ (بی ڈی اے) کی طرف سے جو منصوبے بی بی ایم پی کو منتقل کئے گئے ہیں ان کی تکمیل اور نفاذ کے سلسلہ میں کل 242.74 کروڑ روپئے کا مطالبہ پیش کیا گیا ہے ۔ان کے علاوہ برساتی نالوں (راجا کالووے) کی تجدید و مرمت کے لئے چھ سو کروڑ روپئے، وائٹ ٹاپنگ کے کاموں کے لئے چھ سو کروڑ روپئے، سخت کچرے کے انتظام کے لئے پانچ سو کروڑ روپئے اور پارکوں کے انتظام کے لئے 312 کروڑ روپئے وغیرہ ان مطالبات میں شامل ہیں جو بی بی ایم پی نے ریاستی حکومت کی خدمت میں پیش کئے ہیں۔شہر کی مےئر گنگامبکے ملیکارجن نے اطلاع دی ہے کہ شہر کی ترقی کے لئے چونکہ ریاستی حکومت کا تعاون ضروری ہوتا ہے، اسی لئے مذکورہ تجاویز حکومت کے پاس روانہ کی گئی ہیں تاکہ ان پر بجٹ فراہمی کے سلسلہ میں غور کیا جا سکے۔