بی بی ایم پی کے اگلے میئر کے انتخاب کی تیاریاں
بنگلورو:27؍/ جولائی(ایس او نیوز) برہت بنگلور مہانگر پالیکے کی موجودہ میئر جی پدماوتی کی میعاد 10ستمبر کو پوری ہوجائے گی۔اس کے ساتھ ہی شہر کے اگلے میئر کی تلاش بھی زور پکڑ چکی ہے۔ آنے والی میعاد میں جو بھی میئر بنے گا اس پر انتخابی سال کا دباؤ کافی زیادہ رہے گا۔ جنتادل (ایس) اور آزاد اراکین کے ساتھ کی بدولت پچھلے تین سال سے کانگریس بی بی ایم پی میں بر سر اقتدار ہے۔ چونکہ یہ انتخابی سال ہے اسی لئے جنتادل (ایس) بی جے پی کے ساتھ مفاہمت کرنے یا پھر بی جے پی جے ڈی ایس سے ہاتھ ملانے میں دلچسپی نہیں ظاہر کررہی ہے۔ بتایاجاتاہے کہ بی بی ایم پی میں میئر کے عہدے کی دعویداری کیلئے شہر کے ڈی جے ہلی کے کارپوریٹر سمپت راج اور گووند راج کے نام لئے جارہے ہیں۔اس کے علاوہ ایجی پورہ وارڈ کے کارپوریٹر رام چندرا بھی اہم دعویداروں میں شمارکئے جارہے ہیں۔ دوسری طرف سے یہ بھی کہاجارہا ہے کہ جنتادل (ایس) کانگریس کے ساتھ اس بات کی سودے بازی کی کوشش بھی کرسکتی ہے کہ اس کے کسی کارپوریٹر کو بقیہ مدت کیلئے میئر کا عہدہ دیا جائے۔ فی الوقت وزیر برائے ترقیات بنگلور کے جے جارج کی نگرانی میں بی بی ایم پی کی طرف سے شہر کی ترقی کیلئے بہت سارے منصوبے مرتب کئے جارہے ہیں اور آنے والے دسمبر تک اور بھی ترقیاتی کاموں کو تیزی سے آگے بڑھانے کا وعدہ کیا جارہا ہے۔ یہ بھی کہا جارہا ہے کہ پچھلے تین چار سال سے بی بی ایم پی میں کانگریس کا ساتھ دینے والے تمام جے ڈی ایس کارپوریٹروں کے وراڈوں میں بڑے پیمانے پر ترقیاتی کام شروع کئے جائیں ،اس کیلئے بی بی ایم پی کی طرف سے وزیر اعلیٰ سدرامیا کو ایک تجویز بھی روانہ کی جاچکی ہے، جسے انہوں نے منظور کرلیاہے۔