بنگلورو10؍اپریل(ایس او نیوز) بروہت بنگلور مہانگر پالیکے(بی بی ایم پی) افسران پر نقلی ووٹر شناختی کارڈ جاری کرنے کا الزام لگاتے ہوئے داسرہلی اسمبلی حلقہ کی بی بی ایم پی دفتر کو آج جنتادل(سکیولر) کارکن نے تالا ڈالنے کی کوشش کرتے ہوئے دھرنا دیا۔ احتجاجی مظاہرین نے داسرہلی اسمبلی حلقہ میں بی بی ایم پی افسران کی جانب سے نقلی شناختی کارڈ جو جاری کئے ہیں انہیں فوری منسوخ کرنے کی مانگ کرتے ہوئے نعرے لگائے۔ داسرہلی کے اطراف واکناف علاقے میں کئی تعلیمی ادارے موجود ہیں۔ بیرونی ریاستوں کے ہزاروں طلبا یہاں کے مختلف کالجوں میں زیر تعلیم ہیں۔ ان طلبہ کو بھی ووٹر فہرست میں شامل کرتے ہوئے انہیں نقلی شناختی کارڈز جاری کرنے کاکار کن نے الزام لگایاہے۔ انہوں نے بتایا کہ اس بدعنوانی کے متعلق اعلیٰ افسران سے شکایت کئے جانے کی بات بتائی۔ انہوں نے بی بی ایم پی اعلیٰ افسران سے مطالبہ کیا کہ جن بی بی ایم پی افسران نے نقلی شناختی کارڈ جاری کئے ہیں ان کے خلاف کارروائی کرتے ہوئے جتنے بھی نقلی ووٹر شناختی کارڈ جاری کئے ہیں انہیں فوری منسوخ کریں۔ بی بی ایم پی دفتر کوتالا لگانے کی کوشش کررہے جنتادل(سکیولر) کارکن کو پولیس نے موقع نہیں دیا، جس کے بعد احتجاجی مظاہرین نے افسران کے خلاف نعرے لگائے۔