بنگلورو،17فروری (ایس او  نیوز) بنگلورو شہری ضلع کے انتخابی افسر و بروہت بنگلور مہا نگر پالیکے ( بی بی ایم پی) کمشنر منجوناتھ پرساد نے بتایا کہ آنے والے لوک سبھا انتخابات کے دوران ووٹروں کی سہولت کیلئے انتخابی کمیشن نے ’’الیکشن ایپ‘‘ جاری کیا ہے ۔ جس میں ووٹرس کو نام ،پولنگ بوتھ کا پتہ ، بوتھ تک پہنچنے کا راستہ سمیت دیگر اہم معلومات فراہم ہوں گی۔

بی بی ایم پی دفتر میں طلب کردہ اخباری کانفرنس میں انہوں نے بتایا کہ مذکورہ ایپ کو انڈرائڈ، آئی او ایس ویژن موبائل میں ڈاؤن لوڈ کیا جاسکتا ہے ۔ اس کے ذریعہ ووٹر فہرست میں اپنے کنبے کے نام سمیت دیگر اہم معلومات دستیاب ہوں گی ۔ انہوں نے بتایا کہ سی ۔ وجیو ایپ کے ذریعہ ایم پی سی طرز پر انتخابی ضابطہ اخلاق کی خلاف ورزی معاملات کی ویڈیو گرافی کرکے انتخابی مشاہدین کی نظر میں لاسکتے ہیں۔ یہ اطلاع خفیہ رکھی جائے گی ۔ بی بی ایم پی الیکس تیسری عمارت کی چھٹی منزل پر انتخابات سے متعلق جانکاری اور تفصیلات حاصل کرنے کیلئے ضلع انفرمیشن سنٹر قائم کیا جائے گا۔ انتخابات کی تاریخ کے اعلان کے بعد مذکورہ سنٹر چوبیس گھنٹے کام کرنا شروع کردے گا۔

انہوں نے بتایا کہ ووٹر فہرست سے متعلق تمام تفصیلات ومعلومات ہیلپ لائن نمبر1950سے حاصل کی جاسکتی ہیں۔پارلیمانی انتخابات سے قبل عوام میں بیداری لانے کیلئے ووٹنگ مشینوں اور وی وی پیٹ سے متعلق تفصیلات بتانے مختلف علاقوں میں پروگرامس پیش کئے جائیں گے۔ انہوں نے بتایا کہ ووٹر فہرست میں ناموں کے اندراج کے لئے ایک اور موقع دیا گیا ہے۔ پارلیمانی انتخابات کی نامزدگیاں داخل کرنے کے 10دن قبل تک اپنے نام فہرست میں شامل کئے جاسکتے ہیں، اس کیلئے خصوصی سہولتیں مہیا کی گئی ہیں۔ انہوں نے 18سال مکمل ہوئے نوجوان اور جن افراد کے نام ووٹر فہرست سے غائب ہیں انہیں اپنے نام اندراج کروانے کہا ۔

انہوں نے بتایا کہ بی بی ایم پی کی حدود میں آنے والے تین پارلیمانی حلقوں، بنگلور دیہی ضلع لوک سبھا حلقہ کے تین وارڈوں اور چکبالاپور حلقہ کے یلہنکا وارڈ میں پولنگ کروانے کی ذمہ داری بی بی ایم پی کو دی گئی ہے ۔ اس کیلئے درکار اقدامات کئے جائیں گے۔انہوں نے بتایا کہ بس اسٹانڈوں ریلوے اسٹیشنوں سمیت دیگر اہم علاقوں میں کیونکس رکھے گئے ہیں ۔ اس میں سی ای او کرناٹک، نیشنل ووٹرس ویب سائٹ پر جائیں توتمام تفصیلات مہیا ہیں۔ اگر ووٹر فہرست میں نام نہ ہوں تو آن لائن فوری اپنے نام کا اندراج کرواسکتے ہیں ۔انہوں نے بتایا کہ بنگلور ون ،اے آر او ، آر او دفاتر میں ووٹر نیسیلیٹیشن سنٹر قائم کیا گیا ہے ۔ یہاں بھی اپنے نام اندراج کرنے کا موقع فراہم کیا گیا ہے۔ منجوناتھ پرساد نے بتایا کہ گزشتہ انتخابات کے موقع پر ایک ہی مقام پر سینکڑوں شناختی کارڈ دستیاب ہوئے تھے ۔ اس کو سنجیدگی سے لیا گیا ہے۔ کسی بھی شخص کا شناختی کارڈ کسی دوسرے شخص کا رکھنا قابل سزا جرم ہے ۔ انہوں نے بتایا کہ مذکورہ تینوں لوک سبھا حلقوں میں منصفانہ اور شفاف طریقے سے انتخابات کروانے کے مقصد سے 8515پولنگ بوتھس کی نشاندہی کی گئی ہے۔ ہر10سے 12پولنگ اسٹیشن کے لئے ایک سیکٹر مقرر کیا گیا ہے۔ وہاں بی بی ایم پی افسروں اور ایک پولیس افسر سمیت ایک سیکٹر کیلئے مینجمنٹ ٹیم تشکیل دی گئی ہے۔اس ٹیم کی نگرانی کرنے والے بی بی ایم پی افسر کو مینجمنٹ کے اختیارات دےئے گئے ہیں ۔ اس طرح 410مینجمنٹ سیکٹرس ٹیمیں تشکیل دی گئی ہیں۔ ان ٹیموں کے افسروں کو تربیت دی جارہی ہے ۔

انہوں نے بتایا کہ انتخابات کے دوران بدعنوانیوں کی روک تھام کیلئے 18فلائنگ اسکواڈ ۔18ویڈیو گرافی ٹیمیں بھی تشکیل دی گئی ہیں۔ اس کے علاوہ6ویڈیو گرافی مشاہدین کی ٹیمیں بھی بنائی گئی ہیں۔مذکورہ ٹیمیں مذکورہ پارلیمانی حلقوں میں ہونے والی انتخابی سرگرمیوں پر کڑی نظر رکھیں گی۔ منجوناتھ پرساد نے بتایا کہ گزشتہ انتخابات کے موقع پر ہر ایک پولنگ سنٹرمیں وی وی پیاٹ پر نگرانی کیلئے افسرو ملازمین کا تقرر عمل میں لایا گیا تھا۔ اس مرتبہ پولنگ افسر کو ہی وی وی پیاٹ پر نگرانی رکھنے کیلئے کہا گیا ہے جس سے ہر ایک پولنگ بوتھ میں ایک ملازم کی کمی ہوگی۔انہوں نے بتایا کہ بی بی ایم پی کی حدود میں ہونے والے انتخابات کے لئے جملہ 51ہزار ملازمین کو نامزد کیا جائے گا ۔ انہیں تربیت بھی دی جائے گی۔اخباری کانفرنس میں اسپیشل کمشنر رندیپ سمیت دیگر اعلیٰ افسران شریک تھے۔