بنگلورو،27؍جولائی(ایس او نیوز)شہر گلستان بنگلور کو آلودگی سے پاک کرنے کے لئے بی بی ایم پی نے کمر کستے ہوئے تحفظ ماحولیات کے سلسلے میں سی 40نامی ایک ادارے کے ساتھ معاہدے پر دستخط کئے ہیں۔تحفظ ماحولیات کے لئے 31جولائی سے شہر میں سہ روزہ چوٹی کانفرنس کا اہتمام کیا جارہاہے۔ اس کانفرنس میں مختلف ممالک کے میئر اور ڈپٹی میئر حصہ لے رہے ہیں۔

یہ بات آج شہر کے میئر سمپت راج اور بی بی ایم پی کمشنر منجوناتھ پرساد نے ایک مشترکہ اخباری کانفرنس میں کہی۔ انہوں نے بتایاکہ ریاست کے مختلف شہر بشمول بنگلور، داونگیرے اور ہبلی دھارواڑ میں گردوغبار سے پھیلنے والی آلودگی اپنی حدوں سے متجاوز ہوچکی ہے۔اس کوروک کر بہتر ماحول قائم کرنے کے لئے چند ٹھوس قدم اٹھائے جائیں گے۔انہوں نے کہاکہ اس صورتحال کو قابو میں کرنے کے لئے جو سروے کیا گیا ہے اس سے یہ بات سامنے آئی ہے کہ ٹریفک کی وجہ سے 42 فیصد گرد وغبار پھیلتا ہے۔ جبکہ 20 فیصد سڑکوں کے کناروں کی دھول کی وجہ سے 10فیصد تعمیراتی سرگرمیوں سے اور 14 فیصد صنعتوں سے جبکہ سات فیصد ڈیزل جنریٹروں سے ۔

شمالی کرناٹک کے مقابل بنگلور اور دیگر شہروں میں گرد وغبار کی آلودگی بھلے ہی کم ہو لیکن اس کے مضر اثرات صحت عامہ مرتب ہورہے ہیں۔ بنگلور میں 9مرتبہ آلودگی کے معیار کی جانچ کی گئی ہے۔ اس کے مطابق ہبال میں آلودگی کا اوسط سب سے زیادہ 44 فیصد ہے۔ منجوناتھ پردیش نے بتایاکہ شہر کے ان علاقوں میں آلودگی کافی حد تک کم ہوگئی ہے، جہاں پر میٹرو ٹرین خدمات شروع کی گئی ہیں۔ ایک اندازے کے مطابق میٹرو ٹرین خدمات کی شروعات کے بعد سے روزانہ اوسطاً 30ہزار لوگوں نے گاڑیوں کا استعمال ترک کردیا، شہر کے اور علاقوں میں بھی میٹرو کی وسعت آلودگی کو روکنے میں معاون ثابت ہوگی۔ انہوں نے کہا کہ شہر میں فضائی آلودگی کو قابو میں رکھنے کے لئے بی بی ایم پی نے اپنے بجٹ میں 20کروڑ روپے مہیا کرائے ہیں جس کا استعمال سی 40کے ساتھ کئے گئے معاہدے کے مطابق کیا جائے گا۔