کاسرگوڈ:دوستوں کے ساتھ نہاتے وقت 14سالہ طالب علم نہر میں بہہ گیا
کاسرگوڈ15؍اکتوبر(ایس او نیوز) کیڈور نامی مقام پر پیش آنے والے ایک المناک حادثے میں دوستوں کے ساتھ ندی میں نہانے کے لئے نکلا ہوا طالب علم پانی میں بہہ گیا جس کی لاش آدھی رات کو دستیاب ہوئی۔
موصولہ رپورٹ کے مطابق مہلوک کا نام میلوین ڈیسوزا(14سال) ہے جو 9 ویں جماعت کا طالب علم تھا۔ وہ دوپہر کے وقت اپنے دوستوں کے ساتھ نہانے کے لئے قریبی نہر میں چلاگیا تھا۔ جب شام تک وہ واپس نہیں لوٹا تو اس کے والدین مارسیل اور مارٹیڈا ڈیسوزا کو تشویش ہوئی اور انہوں نے اس کے ساتھ تیرنے کے لئے گئے ہوئے دوستوں سے رابطہ کرکے پوچھا تو معلوم ہوا کہ میلوین نہر کے پانی میں بہہ گیا ہے۔
مقامی ماہی گیروں کے تعاون سے پولیس اور فائر بریگیڈ کے عملے نے میلوین کی تلاش شروع کی تو رات12.30بجے اس کی لاش مقامی ماہی گیروں کے ہاتھ لگی۔کاسرگوڈ جنرل اسپتال میں پوسٹ مارٹم کے بعد لاش کو اس کے والدین کے حوالے کیا گیا۔ پولیس نے غیرفطری موت کا کیس درج کرلیا ہے۔