آر ایس ایس کارکن شرتھ مڈیوال قتل کے کلیدی ملزم کوملی مشروط ضمانت
بنٹوال23؍جون (ایس او نیوز) آر ایس ایس کارکن شرتھ مڈیوال قتل کے نامزد کلیدی ملزم محمد شریف کوہائی کورٹ سے مشروط ضمانت ملی ہے۔ جسٹس جان میکائیل ڈی کونہا کی بینچ نے محمد شریف کی ضمانت عرضی پر سماعت کے بعد دولاکھ روپے کے بانڈ، دو شخصی ضمانتیں اور ثبوت نہ مٹانے کا تحریری وعدہ فراہم کرنے کی شرائط کے ساتھ ضمانت منظور کی ہے۔
کہاجاتا ہے کہ ملزم محمد شریف کی وکالت کرنے والے ایڈوکیٹ بی لطیف نے عدالت کے سامنے یہ بات رکھی ہے کہ ملزم کے خلاف کوئی ٹھوس شہادت پیش کرنے میں استغاثہ ناکام رہا ہے۔عدالتی بینچ نے دفاعی وکیل کا بیان درج کرنے کے بعدملزم کو مشروط ضمانت پر رہا کرنے کا حکم جاری کردیا۔ خیال رہے کہ بنٹوال میں فرقہ وارانہ کشیدگی کے پس منظر میں گزشتہ سال 4؍جولائی کو شرتھ مڈیوال کا قتل اس کی لانڈری میں ہواتھا ۔جس کے بعد پورے ضلع شمالی کینرا میں امن وامان کی صورتحال بگڑ گئی تھی اور کئی ناخوشگوار واقعات اور قتل کی وارداتیں پیش آئی تھیں۔