مینگلور کے قریب بنٹوال میں مسلح افراد پر پولیس کی فائرنگ۔ ڈکیتی اور مویشی چوری کا منصوبہ ناکام
مینگلور یکم جون (ایس او نیوز) مینگلور کے قریبی علاقہ بنٹوال میں ٹاؤن پولیس اسٹیشن اور مضافاتی پولیس اسٹیشن کے افسران نے ایک کار پر فائرنگ کی جس میں پولس کے مطابق کچھ مسلح افراد موجود تھے جن کا مقصد کوئی ڈکیتی انجام دینا اور مویشی چرالے جاناتھا۔
بتایا گیا ہے کہ بیلتھنگڈی پولیس اسٹیشن کو ایک فون کال موصول ہوا، جس میں بتایا گیا کہ چارپانچ افراد ایک سرخ رنگ کی سوِفٹ کار میں ہیجانی کیفیت میں یہاں سے وہاں گھومتے نظر آرہے ہیں اور ان کے پاس ہلاکت خیز ہتھیار موجود ہیں۔ فون پر یہ بھی بتایا گیا کہ جب کچھ لوگوں نے انہیں دیکھ کر شور مچایا تو وہ لوگ کار سمیت گرو ویاناکیری کی طر ف بھاگ گئے ہیں۔پولیس نے چیک پوسٹ پر کار کو روکنے کا اشارہ کیالیکن کار رکنے کی بجائے تیزی کے ساتھ بی سی روڈ کی طرف بھگادی گئی۔جب چیک پوسٹ پر موجود پولیس افسران نے بنٹوال پولیس کو اس بات کی اطلاع دی تو بنٹوال ٹاؤن اور مضافاتی پولیس اسٹیشنوں سے وابستہ سب انسپکٹرس اور ان کے عملے میں مانی ہلّا نامی مقام پر چیک پوسٹ لگادی۔اسی دوران بنٹوال پولیس کو خبر ملی کہ پونجل کٹے نامی ایک اور چیک پوسٹ پر بھی کار رکے بغیر آگے بڑھ گئی ہے۔
جب بنٹوال چیک پوسٹ پر کار کو رکنے کا سگنل دیا گیا تو مبینہ طور پر کار میں موجودافراد نے تیز رفتاری سے کار آگے بڑھاتے ہوئے تلواروں سے پولیس افسران پر حملہ کرنے کی کوشش کی۔ اس کے جواب میں سب انسپکٹر چندر ا شیکھر اور سب انسپکٹرپرسنّا نے کار پر فائرنگ کردی۔فائرنگ کے دوران کار دوسری طر ف بھگالے جانے کی کوشش کی گئی مگرعجلت کی وجہ سے وہ ایک نالے میں پھنس کر رہ گئی۔جب تک پولیس والے کار کو گھیر لیتے پچھلی نشست پر بیٹھے ہوئے دو افراد فرار ہونے میں کامیاب ہوگئے جبکہ پولیس نے بقیہ تین افراد کو دبوچ لیا۔
کار کی تلاشی لینے پر ایک لوہے کی سلاخ، دو تلواریں، ایک منکی کیپ،مرچ پاوڈراور رسیاں اس کے اندر سے برآمد ہوئیں۔پولیس کے بیان کے مطابق کار میں موجود افراد نے بتایا ہے کہ وہ سڑک پر کاروں کو روک کر لوٹنے اور موقع ملنے پر مویشی چرانے کا منصوبہ رکھتے تھے۔پولیس نے ان تینوں افراد کو گرفتار کرلیا جن کی شناخت محمدمحسن(23سال)محمد ارشاد (29سال) اورصدام کے بطور کی گئی ہے۔ان تینوں کے بارے میں بتایاگیا ہے کہ ان کا مجرمانہ ریکارڈ ہے جس میں قتل اور عمداً قتل کے معاملات بھی شامل ہیں۔تازہ معاملے میں ان افراد پر مختلف دفعات کے تحت کیس درج کرلیا گیا ہے۔