وجرادیہی سوامی تفتیشی افسر کے سامنے حاضری کے لئے پولیس کا نوٹس جاری
بنٹوال، 16؍جولائی (ایس او نیوز)آر ایس ایس رضاکار شرتھ مڈیوال کے قتل کے سلسلے میں اپنے پاس بہت ہی اہم اورخاص سراغ ہونے کا دعویٰ کرنے والے وجرا دیہی مٹھ کے سوامی راج شیکھرانندا کو تفتیشی افسر کے سامنے حاضر ہونے کے لئے پولیس نے نوٹس جاری کردیا ہے۔
پولیس کے نوٹس میں سوامی کو ہدایت کی گئی ہے کہ وہ 17جولائی کو مذکورہ قتل کے سلسلے میں تفتیش کرنے والے افیسر کے روبروبنٹوال پولیس اسٹیشن میں حاضر ہوں۔خیال رہے کہ ہندو رکھشنا سمیتی کے اعزازی صدر مذکورہ سوامی جی نے 14جولائی کو ایک پریس کانفرنس کے دوران اعلان کیاتھا کہ ان کے پاس شرتھ کے قتل کے سلسلے میں موجود سراغ وہ اسی صورت میں ظاہر کریں گے جبکہ اس کی تحقیقات این آئی اے کو سونپی جائے گی۔
یہ بات یاد رکھنے کی ہے کہ انڈین پینل کوڈ کے مطابق کسی جرم کے بارے میں سراغ چھپانا بھی قابل سزا جرم ہوتا ہے۔ اب دیکھنا یہ ہے کہ سوامی راج شیکھرانندا کے پاس موجود ثبوتوں کی بنیا دپر شرتھ کے قاتل گرفتار ہوتے ہیں یا اپنے ہی بیان کے جال میں خودسوامی جی قانونی شکنجے میں پھنس جاتے ہیں۔