بنٹوال: خوبصورت عورتوں کے جال ''ہنی ٹریپ''کا شکار،زیورات، نقدی اور کار سے ہاتھ دھو بیٹھا
بنٹوال 22؍اکتوبر(ایس او نیوز) دھوکہ دہی اور لوٹ مار کی نیت سے مردوں کو جنسی لذت کا لالچ دے کر خوبصورت عورتوں کے جال میں پھنسانے کا ایک نیٹ ورک جنوبی کینرا ضلع میں کافی عرصے سے سرگرم ہے۔
اس طرح کے 'ہنی ٹریپ' کی تازہ واردات بنٹوال کے قریب وٹلا میں پیش آئی ہے جہاں محمد حنیف (32سال) کوخوبصورت لڑکی کے جال میں پھانسنے کے بعد اس کی بری طرح پیٹائی کی گئی ہے اور اس کے پاس موجود سونے کے زیورات، نقدی اورکار لوٹ لی گئی ہے۔
موصولہ رپورٹ کے مطابق محمد حنیف موڈبیدری میں واقع پتھروں کی کان میں ایک سپر وائزر کے طور پر کام کررہا ہے ۔ وہ کولانڈو میں اپنی بیوی اور بچوں کے ساتھ کرایے کے مکان میں رہائش پزیر ہے۔چند دن پہلے فیس بک پر اس کی شناسائی ایک نوجوان لڑکی سے ہوئی۔ اور ان دونوں کی چیاٹنگ کا سلسلہ چل پڑا۔21اکتوبر کی نصف شب میں اس لڑکی نے حنیف کو فون کرکے کہا کہ اس کی والدہ اچانک بیمار ہوگئی ہے اور اسے اس وقت پیسوں کی سخت ضرورت پیش آئی ہے۔حنیف موڈیپو نامی مقام پر پہنچاتو وہ لڑکی اپنے ساتھ ایک اور سہیلی کو لے آئی اور حنیف سے کہا کہ وہ اپنی سہیلی کو کار میں بٹھاکر اپنے گھر لے جائے اور وہ خود اپنی اسکوٹر پر ان کے پیچھے آئے گی۔جیسے ہی حنیف اس لڑکی کے ساتھ اپنے گھر پہنچا تو ایک ٹاٹا سومو کار میں 6افراد کا گروہ حنیف کے گھر میں گھس آیا۔ان لوگوں نے حنیف کو باندھ کررات 2بجے سے 4بجے تک اس کی خوب پیٹائی کی۔ لڑکی کو ننگی حالت میں حنیف کے ساتھ کھڑا کرکے فوٹو اور ویڈیو بنائے۔ پھر حنیف سے 5لاکھ روپے کی رقم طلب کی۔حنیف نے جب رقم نہیں دی تو وہ لوگ اس کے گھر کی الماری میں موجود7سونے کی گنّیاں ، پاسپورٹ، دستی گھڑی ، موبائل فون اور اس کی سوِفٹ کار لے کر فرار ہوگئے۔
حنیف کی شکایت درج کرلینے کے بعد پولیس اس معاملے کی تحقیقات کررہی ہے۔