بنٹوال میں ابراہیم خلیل پر چاقو سے حملہ کرنے کے الزام میں ہندو جاگرن ویدیکے کا لیڈر رتناکرشٹی گرفتار
مینگلور28/جولائی (ایس اؤنیوز) بنٹوال تعلقہ کے کلڈکا میں ابراہیم خلیل نامی نوجوان پر چاقو سے حملہ کرنے کے الزام میں پولس نے ہندو جاگرن ویدیکے کے لیڈر رتناکر شٹی کو گرفتارکرلیا ہے۔
13جون کو رتنا کرشٹی اور اس کی چار ملزموں پر مشتمل ٹیم ابراہیم خلیل پر چاقو سے حملہ کرنےکے بعد فرار ہوگئی تھی ۔ ابراہیم خلیل کی طرف سے بنٹوال شہری پولس تھانے کو دی گئی شکایت پر پولس نے رتنا کرشٹی اور دیگر چار کےخلاف اقدام قتل کا معاملہ درج کرلیا تھا۔ واردات کے بعد رتنا کرشٹی نے ابراہیم خلیل پر چاقو سے حملہ کرنے کا الزام عائد کرتے ہوئے نجی اسپتال میں داخل ہواتھا، قریب ڈیڑھ ماہ بعد جمعرات کو پولس نے رتنا کرشٹی کو اسپتال سے گرفتار کرلیا اور عدالت میں پیش کردیا۔
خیال رہےکہ واقعہ کے2دن بعد اسپتال میں زیر علاج رتنا کرشٹی پولس سکیورٹی کے باوجود اسپتال سے راتوں رات فرار ہوگیا تھا، اس معاملے میں فرائض میں غفلت برتنے پر پتور پولس تھانہ کے ایس آئی اور دو پولس عملے کو معطل بھی کیا گیا تھا، جس کے فوری بعد رتناکر شٹی دوبارہ اسپتال پہنچ کر ایڈمٹ ہوگیاتھا۔