بنٹوال 17؍مئی (ایس او نیوز)ذہنی طور پر معذور لڑکے سمیت دلت طبقے کے دواسکولی لڑکوں کو کچھ لوگوں نے زبردستی گانجہ پینے پر مجبور کرنے کی کوشش کی مگر ان دونوں نے جب اس طرح نشہ آور چیز استعمال کرنے سے انکار کیا تو ان کی پیٹائی کرنے کا واقعہ سامنے آیا ہے۔

رپورٹ کے مطابق کومڈیلو نامی گاؤں میں اس واردات کا شکار ہونے والوں کے نام سمپت(16سال) سوشانک(14سال) بتائے جاتے ہیں، جو بالترتیب دسویں جماعت اورساتویں جماعت کے طالب علم ہیں۔ان میں سے سوشانک ذہنی طورپر معذور لڑکا ہے۔جب یہ لڑکے سرکاری اسکول کے احاطے میں کھیل رہے تھے ، تو کچھ لوگ وہاں گانجہ کا نشہ کرنے میں مصروف تھے۔ پھر ان لوگوں نے ان دو بچوں کو اپنے قریب بلایا اور انہیں بھی گانجہ پینے پر مجبور کرنے لگے۔ جب ان دونوں نے ان کی بات نہیں مانی تو ان کی بری طرح پیٹائی کردی ۔دونوں طالب علموں کو علاج کے لئے اسپتال میں داخل کیے جانے کی خبر ہے۔

ان اسکولی لڑکوں کو گانجہ استعمال کرنے کے لئے زبردستی کرنے اور انکار کرنے پر پیٹائی کرنے والوں کے نام شراون، روشن،چرن،راجیش اور اویناش بتائے جاتے ہیں۔کہاجاتا ہے کہ مذکورہ بالا پانچوں ملزمین اس سے پہلے گانجہ کے معاملے میں جیل میں بند تھے اور کچھ دنوں پہلے ہی ضمانت پر رہا ہوئے ہیں۔بنٹوال دیہی پولیس نے ان لوگوں کے خلاف کیس درج کرلیا ہے۔