بنٹوال30؍نومبر(ایس او نیوز) وٹلا بس اسٹانڈکے پاس کنہن گڈے انٹر اسٹیٹ ہائی وے پر ہونے والے موٹر بائک اور لاری کے تصادم میں ایک سابق فوجی ہلاک ہوگیا ہے۔

موصولہ رپورٹ کے مطابق روڈ کے گھماؤ پر بے پروائی اور انتہائی تیز رفتاری سے چلائی جارہی پتھروں سے لدی ہوئی لاری نے سابق فوجی وینکپّا مولیا (53سال) کی موٹر بائک کو پیچھے سے ٹکر ماری۔جس کے نتیجے میں بائک سمیت سوار بھی اچھل کر روڈ پر گرگیا اورسیدھے لاری کے چکروں کی زد میں آگیا۔اس وجہ سے مولیا کے دونوں پیر بری طرح کچلے گئے۔ زخمی مولیا کوفوری طور پراسپتال لے جانے کی کوشش کی گئی مگر اس نے راستے میں ہی دم توڑ دیا۔ کہا جاتا ہے کہ فوج سے ریٹائر ہونے کے بعد مولیا ایک سافٹ ویئر کمپنی میں سیکیوریٹی گارڈ کی خدمات انجام دے رہاتھا۔اس حادثے کے تعلق سے وٹلا پولیس اسٹیشن میں کیس درج کرلیا گیا ہے۔