بنٹوال 11ستمبر (ایس او نیوز) ایندھن کی قیمتوں میں بے تحاشہ اضافے کے خلاف 10ستمبر کو کانگریس اور دیگرحزب مخالف کی اتحادی جماعتوں نے بھارت بند کا اعلان کیا تھا اس دوران بنٹوال میں رکن اسمبلی راجیش نائک پر پتھر پھینکنے کا واقعہ پیش آیا تھا۔ اس ضمن نے بی جے پی لیڈروں نے پولیس پر سخت تنقید کرتے ہوئے وارننگ دی ہے کہ اگر 11ستمبر منگل کے دن تک ملزموں کو گرفتار نہیں کیا گیا تو زبردست احتجاجی مظاہرہ کیا جائے گا۔

کہاجاتا ہے کہ پانیمنگلوروکے پاس سے جب بند کے دوران ایم ایل اے راجیش نائک کی کار گزر رہی تھی تو بند کے حامیوں نے ان کی کار پر ایک بڑا سا پتھر پھینک مارا۔ مگر خوش قسمتی سے راجیش نائک کو کوئی چوٹ نہیں آئی۔اس بات کے اطلاع ملتے ہی بی جے پی کارکنان نے بنٹوال اسٹیشن کے باہر احتجاجی دھرنا دیا اور ملزموں کو گرفتار کیے جانے تک وہاں نہ ہٹنے کی ضد پکڑلی۔ بی جے پی کارکنان نے پولیس پر الزام لگایا کہ وہ جانب داری سے کام لے رہی ہے اور سوال کیا کہ کسی مخصوص پارٹی نے بنٹوا ل پولیس اسٹیشن کو اغوا کرلیا ہے کیا؟ان کا کہنا تھا کہ احتجاج کے دوران پولیس نے موجودہ ایم ایل اے کو تحفظ فراہم کرنے کے بجائے سابق وزیر کو سیکیوریٹی دے رکھی تھی۔بی جے پی والوں نے الزام لگایا کہ کانگریسی کارکنان نے بڈا کٹے،مانی ، ماری پلاّاور کائیکمبا جیسے مقامات پرعام لوگوں پر حملے کیے ، مگر پولیس نے ان کے خلاف کوئی کیس درج نہیں کیا۔ 

اے ایس پی رشی کیش وناونے اور بنٹوال سرکل انسپکٹر ٹی ڈی ناگراج نے جب ۱۱ستمبرمنگل تک ملزموں کو گرفتار کرلیا جائے گا توبی جے پی کارکنان نے اپنا احتجاج یہ کہتے ہوئے ختم کیا کہ اگر ایسا نہیں ہواتو بی جے پی کی طرف سے پرزور احتجاج کیا جائے گا۔

رکن اسمبلی راجیش نائک نے پولیس کے پاس شکایت درج کرتے ہوئے کہا ہے کہ:’’ بند کے دوران جب سڑک پر بہت ساری گاڑیاں دوڑ رہی تھیں ، تب مظاہرین نے صرف ان کی گاڑی پر نشانہ سادھ کر پتھر پھینکا تھا۔مجھے اپنی ذمہ داریاں نبھا نے سے باز رکھنے کی کوشش کرنے والوں کے خلاف قانونی کارروائی کی جانی چاہیے۔‘‘