بنٹوال، 7؍جون (ایس او نیوز) یہاں وٹلا کی ایک اے ٹی ایم مشین سے 2000روپے کے پھٹے نوٹ برآمدہونے کا واقعہ پیش آیا ہے۔ تفصیل یہ بتائی جاتی ہے کہ بشیر نامی شخص نے کرناٹکا بینک کے اے ٹی ایم سے 8000روپے نکالے جس میں6ہزار روپے 2ہزار کے نوٹوں کی شکل میں تھے اوروہ سب پھٹے ہوئے تھے۔ 

پھٹے نوٹوں کو لے کر بشیر اے ٹی ایم کے پاس ہی کھڑا تھا تو دوسرے گاہک نے اے ٹی ایم سے پیسے نکالے اور اس وقت بھی پھٹے ہوئے 2ہزار کے نوٹ مشین سے نکلے۔ تب وہاں پر موجود گارڈ نے بینک منیجر کا نمبر دیا جس سے رابطہ کرنے پر جواب ملا کہ مشین میں روپے جمع کرنے والی کمپنی کی گاڑی وہاں پہنچنے والی ہے، اس لئے اسی جگہ انتظار کیا جائے۔ جب بڑی دیر تک گاڑی وہاں نہیں پہنچی تو دوبارہ رابطہ کرنے پر جواب ملا کہ گاڑی دوسرے مقام پر پہنچ گئی ہے اس لئے وہ لوگ نوٹ بدلنے کے لیے بینک کی کڈبا برانچ میں آجائیں۔

کرناٹکا بینک کڈبا برانچ کے منیجر سری ہری نے کہا ہے کہ اس معاملے کو سنجیدگی سے لیتے ہوئے نوٹ سپلائی کرنے والی سی ایم سی کمپنی سے جواب طلب کیا گیا ہے۔