بنگلورو،16؍اکتوبر(ایس او نیوز؍عبدالحلیم منصور)ریاستی وزیر برائے ترقیات بنگلور کے جے جارج نے کہاکہ ریاست بھر میں حکومت حقہ کے استعمال پر مستقل پابندی لگانے پر سنجیدگی سے غور کررہی ہے۔آج بی بی ایم پی ہیڈکوارٹرس میں افسران اور ملازمین کی اسوسی ایشن کے زیر اہتمام سگریٹ نوشی سے آزاد شہر کے متعلق منعقدہ تقریب سے خطاب کرتے ہوئے انہوں نے کہاکہ جب وہ وزیر داخلہ تھے تو اسی وقت انہوں نے شہر میں حقہ کے استعمال پر شہر میں مکمل پابندی عائد کرنے کا فیصلہ کیا تھا، لیکن اس فیصلے کے خلاف کچھ لوگ عدالت سے رجوع ہوگئے ، جس کی وجہ سے اسے مکمل طور پرنافذ نہیں کیا جاسکا۔ انہوں نے کہاکہ وزیر صحت رمیش کمار سے اس سلسلے میں تبادلۂ خیال کرکے محکمۂ صحت کی طرف سے بھی حقہ پر پابندی لگانے پر ضروری احکامات جاری کرائے جائیں گے۔ بتایاجاتا ہے کہ حقہ پر پابندی لگانے کیلئے موجودہ قوانین کے تحت اختیارات نہیں ہیں۔انہوں نے کہاکہ ایک اندازہ کے مطابق ملک بھر میں دو کروڑ سے زائد افراد سگریٹ نوشی میں مبتلا ہیں۔ان میں سے سالانہ 30 فیصد کو کم کرنے پر خصوصی توجہ دی جارہی ہے۔