کاروار12؍اکتوبر (ایس او نیوز) کاروار تعلقہ کے کورنی پیٹے سنڈیکیٹ بینک کی شاخ میں سونے کی جانچ پر مامور سُنار کی ملی بھگت سے کچھ دغابازوں نے نقلی سونا گروی رکھ کر لاکھوں روپے قرض حاصل کرلیا اور بینک کے افسران کو اس کی بھنک تک نہیں لگی۔

مصدقہ اطلاعات کے مطابق کچھ قرض دارو ں نے میعاد گزرنے کے باوجودرقم لوٹا کر گروی رکھا ہوا سونا بینک سے واپس نہیں لیا تو بینک کے افسران نے 6.77لاکھ روپے کے عوض گروی رکھے ہوئے سونے کی نیلا می کا فیصلہ کیا۔ اس موقع پر پتہ چلا کہ یہ سونا نقلی ہے۔بینک افسران نے سونے کی جانچ کے ذمہ دار سُنار راجکمار شیٹھ اور دیگر چار افراد کے خلاف پولیس میں دھوکہ دہی کا کیس داخل کردیا ہے۔حیرانی کی بات یہ ہے کہ اس ایک کیس کے سامنے آتے ہی جب بینک کے افسران نے گروی والے قرضہ جات کے دیگر معاملات کی جانچ شروع کی تو مزید 25ایسے کیس سامنے آئے ہیں ۔ معلوم ہوا ہے کہ بینک کی اندرونی تفتیش جاری ہے اور دھوکہ دہی کے اور بھی معاملات سامنے آنے کا خدشہ جتایا جارہا ہے کیونکہ سنڈیکیٹ بینک کی اس شاخ میں سونا گروی رکھ کرقرضہ لے جانے کے تقریباً 300کھاتے ہیں۔ دو تین دن کے اندر اس تعلق سے مزید تفصیلات سامنے آنے کی توقع ہے۔

اس ووران پتہ چلا ہے کہ راج کمار شیٹھ کورنی پیٹے میں واقع اپنی جیویلری دکان کو تالا لگاکر دو دن سے لاپتہ ہوگیا ہے۔ جس کے بعدعوام کی طرف سے  بھی یہ شکایت سننے میں آرہی ہے کہ راجکمار شیٹھ اپنی دکان میں بھی گاہکوں کے ساتھ دھوکہ کرتے ہوئے انہیں اصلی سونے کے نام پر نقلی سونا بیچا کرتا تھا۔اس تعلق سے دھوکا کھانے والے کچھ   لوگ جب اس کی دکان پر پہنچے تو دکان بند دیکھ کر یہ لوگ  بھی پریشانی میں مبتلا ہوگئے ہیں۔