نیویارک،20ستمبر(ایس او نیوز؍آئی این ایس انڈیا)بنگلہ دیشی وزیر اعظم شیخ حسینہ نے کہا ہے کہ میانمار کو ان تقریباً 420,000 روہنگیا مسلمانوں کو واپس لینا چاہیے جو تشدد سے فرار ہو کر پناہ کے لیے بنگلہ دیش پہنچے ہیں۔ انہوں نے یہ بیان امریکی شہر نیو یارک میں اقوام متحدہ کی جنرل اسمبلی کے اجلاس کے موقع پر بنگلہ دیشی رضاکاروں کے ساتھ بات چیت کرتے ہوئے منگل کی شب دیا۔ شیخ حسینہ کے بقول انہوں نے میانمار حکومت سے کہہ دیا ہے کہ سالہا سال سے وہاں آباد روہنگیا مسلمان میانمار کی ذمہ داری ہیں اور حکومت کو ان کو پناہ فراہم کرنے کا بندوبست کرنا چاہیے۔ قبل ازیں میانمار کی رہنما آنگ سان سوچی کہہ چکی تھیں کہ میانمار روہنگیا مسلمانوں کو واپس لینے کے لیے تیار ہے۔