ریاستی ضمنی انتخابات کے نتائج : آج سے بی جے پی کی ہار شروع ،بلاری قلعہ کا کیا ہوا؟ سدرامیا اور دیوے گوڈا پر امید
بنگلورو:6؍نومبر (ایس او نیوز) ریاست کے ضمنی انتخابات میں کانگریس ،جے ڈی ایس مخلوط حکومت شاندار جیت حاصل کرنےکے بعد سیاسی لیڈران کے بیان 2019کے لوک سبھا انتخابات کا بگل بجاتے ہوئے بی جےپی کو چوطرفہ گھیرنے کی تیار ی میں نظر آر ہے ہیں۔
ضمنی انتخابات کے نتائج سامنے آتے ہی سابق وزیرا علیٰ سدرامیا نے ٹویٹ کرتے ہوئے آج سے ہوئے بی جے پی کے ہار کی شروعات کہا ہے۔ انہوں نے پُر اعتماد لہجے میں دعویٰ کیا ہے کہ یہ سلسلہ 2019کے لوک سبھا انتخابات می بھی جاری رہے گا۔ ضمنی انتخابات میں مخلوط حکومت کی جیت کو دیوالی کا تحفہ قرار دیا ہے۔
سدرمیاکا کہنا ہے کہ میں نےپہلے ہی پیش گوئی کی تھی بلاری کا قلعہ ہمارے ہاتھ میں ہے وہاں ہمارے امیدوار اُگرپا 2لاکھ سے زائد ووٹوں سے جیت حاصل کریں گے۔ حلقہ میں دور کرنے کے بعد مجھے اچھی طرح پتہ تھا کہ عوام کا رجحان کس طرف ہے ۔ آج میری بات سچ ہوگئی ہے۔ بی جےپی والے بار بارعوام کو یہ باور کرارہے تھے کہ مخلوط حکومت ختم ہوجائے گی ، آج عوام نے ثابت کیا ہے کہ کانگریس بہت مضبوط ہے اور آئندہ لوک سبھا انتخابا ت میں مشترکہ الیکشن لڑنے کی بات کہی۔
سابق وزیراعظم ، جے ڈی ایس کے سپریمو ایچ ڈی دیوے گوڈا نے پدمنابھ نگر کے اپنے مکان میں ضمنی انتخابات کے نتائج پر بات کرتے ہوئے کہاکہ کانگریس اور جے ڈی ایس کے لیڈران اور کارکنا ن کی متحدہ کوششوں کا نتیجہ 4حلقوں میں جیت کے طورپر ملا ہے۔ جس کے لئے ہم رائے دہندگان کا شکریہ اداکرتے ہیں۔ سابق وزیرا عظم نے کہاکہ اپنے اختلافات کو بھول کر ہم نئی شروعات کریں گے متحدہ کام کریں گےاورآئندہ لوک سبھا انتخابات میں بھی کانگریس کے ساتھ الیکشن لڑنے کی بات کہی۔
دیوے گوڈا نے بی جےپی والوں پر طنز کستے ہوئے کہاکہ بلاری قلعہ کا کیاہوا؟ ۔ جس حلقے کو بی جےپی مضبوط قلعہ مان رہی تھی وہاں کانگریس کی جیت ثابت کرتی ہے وہ قلعہ سے باہر ہوگئے ہیں۔ شیموگہ کی ہار پر کہاکہ امیدوار کو طئے کرنے میں دیری ہوئی اگر وقت سے پہلے امیدوار کھڑا کرتے تو ہم یقینی طورپر جیت جاتے کیونکہ ہار کا فاصلہ صرف 52ہزار ہے۔
