بنگلورو۔30/اگست(ایس او نیوز) ریاست بھر میں کسانوں کو دئے جانے والے بلاسودی قرضے کی رقم کو تین لاکھ روپیوں سے گھٹا کر 25ہزار روپے کرنے کے سلسلے میں ریاستی حکومت نے تمام کوآپریٹیو اداروں کو سرکیولر جاری کیا ہے۔حکومت نے کوآپریٹیو اداروں سے کہا ہے کہ زرعی قرضہ جات فراہم کرنے کیلئے وافر فنڈز کی عدم دستیابی کی بنیاد پر قرضہ جات کی فراہمی پر بندش لگائی جائے اور بلا سودی قرضے کی حد کو تین لاکھ روپیوں سے گھٹا کر 25ہزار روپے کی جائے۔ حکومت نے واضح کیا ہے کہ زرعی قرضہ جات کیلئے نبارڈ سے جو رقم ملتی ہے اس میں سے محض 50 فیصد ہی مل پائی، رواں سال یہ رقم گھٹا کر چالیس فیصد کرنے کا مرکزی حکومت نے اعلان کیا ہے۔رواں سال ریاست کے کسانوں کو گیارہ ہزار کروڑ روپیوں کا زرعی قرضہ دینے کا فیصلہ کیا گیاتھا، لیکن نبارڈ نے اس میں سے 3120کروڑ روپے جاری کئے ہیں۔