بنگلورو،3؍اکتوبر(ایس او نیوز) شہر کے ان علاقوں میں جہاں پر میٹرو ٹرین کا پراجکٹ مکمل ہوچکا ہے وہاں پر روزانہ لاکھوں کی تعداد میں لوگ میٹرو ٹرین کے ذریعہ سفر کررہے ہیں۔ میٹرو ٹرین کی اس قدر کامیابی کی توقع میٹرو حکام کو بھی نہیں تھی۔تاہم اس کی غیر معمولی کامیابی کو دیکھتے ہوئے یہ مانگ شدت سے محسوس کی جارہی تھی کہ ہر میٹرو ٹرین کی بوگیوں میں اضافہ کیا جانا چاہئے۔اس مانگ کو دیکھتے ہوئے بنگلور میٹرو ریل کارپوریشن نے طے کیاہے کہ روزانہ صبح 9-30 سے 11-30 تک اور شام 5-00 سے 8؍ بجے تک میٹرو ٹرین کی بوگیوں میں اضافہ کریں۔میٹرو ریل کارپوریشن کے حکام نے بتایاکہ ان اوقات میں میٹرو ٹرین کی بوگیوں کی تعداد کو تین سے بڑھا کر چھ کردیا جائے گا۔ فی لوقت شہر میں 50میٹرو ٹرین تین تین بوگیوں پر مشتمل دوڑ رہی ہیں۔ان اوقات میں بوگیوں کی تعداد بڑھا کر چھ کردی جائے گی۔ مسافروں کی تعداد کو دن بدن بڑھتے ہوئے دیکھ کر میٹرو ریل کارپوریشن نے 150نئی بوگیاں بی ای ایم ایل سے خریدنے کا فیصلہ کیا ہے اور اس کیلئے 1421 کروڑ روپیوں کا ٹھیکہ بھی کمپنی کو دیا ہے۔ بتایاجاتا ہے کہ ان نئی بوگیوں کی سربراہی جولائی 2018 سے شروع ہوجائے گی اور دسمبر 2018 تک سبراہی کا یہ عمل جاری رہے گا۔ اس حساب سے نما میٹرو میں مجموعی بوگیوں کی تعداد آئندہ سال کے اواخر تک بڑھ کر تین سو سے زائد ہوجائے گی۔ بیپنا ہلی ، میسور روڈ، پر فی الوقت 18 ریل گاڑیاں اور یلچن ہلی ناگسندرا روٹ پر گیارہ ریل گاڑیاں دوڑ رہی ہیں۔ان گاڑیوں کی تعداد کو بڑھاکر 21 اور29 علی الترتیب کیاجائے گا۔ فی الوقت بنگلور میٹرو ٹرین کی تین بوگیوں میں 975 مسافروں کے سفر کی گنجائش موجود ہے۔ تین اضافی بوگیوں کو جوڑے جانے سے ہر ٹرین میں دو ہزار مسافر سفر کرسکیں گے۔مسافروں کی بڑھتی ہوئی تعداد کو دیکھتے ہوئے یہ بھی غور کیاجارہا ہے کہ بعض علاقوں میں بوگیوں کی تعداد کو بڑھا کر کیوں نہ 9؍ کیاجائے۔ خاص طور پر پینیا انڈسٹریل ایریا ، یلچن ہلی اور دیگر علاقوں سے بڑی تعداد میں مسافروں کے آنے جانے کو دیکھتے ہوئے ان انتظامات پر غور کیاجارہا ہے۔