بنگلورو۔26/ستمبر(ایس او نیوز) برہت بنگلور مہانگر پالیکے کی اگلی میئر کے طور پر شہر کے پرکاش نگر کی کارپوریٹر جی پدماوتی کا منتخب ہونا تقریباً طے نظر آرہاہے، اس سلسلے میں محض سرکاری اعلان باقی ہے۔کل بی بی ایم پی میں کانگریس اور جنتادل (ایس) کے اتحاد کو برقرار رکھنے پر دونوں پارٹیوں کے قائدین نے اتفاق کرلیا۔جس کے ساتھ ہی میئر اور ڈپٹی میئر کے انتخاب کیلئے راستہ صاف ہوگیاہے۔ دونوں پارٹیوں کے درمیان اقتدار کی تقسیم کے فارمولے کو بھی قطعیت دی جاچکی ہے۔ ساتھ ہی جی پدماوتی کے بطور میئر انتخاب کو روکنے کیلئے سبرامنیا نامی شخص کی طرف سے ڈویژنل کمشنر جینتی کے پاس درج شکایت کو بھی خارج کردیاگیا ہے، جس کے سبب میئر کے عہدہ کیلئے ان کا انتخاب اور سہل ہوچکا ہے۔ بتایاجاتاہے کہ سبرامنیم کو اپنی شکایت الیکشن کمیشن سے کرنی چاہئے تھی، ڈویژنل کمشنر اس معاملہ میں کچھ نہیں کرسکتیں، جس کے سبب ان کی شکایت کو خارج کیاجاچکا ہے۔ اس دوران وزیر ٹرانسپورٹ رام لنگا ریڈی نے بھی برہت بنگلور مہانگر پالیکے کے میئر کے طور پر پدماوتی کے انتخاب کی تصدیق کی۔ میئر کے عہدہ کیلئے دعویداروں میں شانتی نگر کی سومیا شیوکمار اور لاونیا گنیش ریڈی بھی شامل ہیں۔ ان تینوں ناموں کو وزیر اعلیٰ سدرامیا کے پاس روانہ کیا گیاہے، لیکن بتایاجاتاہے کہ سب سے سینئر کارپوریٹر ہونے کے ناطے پدماوتی کا انتخاب ہوگا۔ مسٹر رام لنگا ریڈی نے کانگرس جے ڈی ایس اتحاد کو خوش آئند قرار دیتے ہوئے کہاکہ پہلے سے ہی جنتادل (ایس) کا ارادہ بی جے پی کے ساتھ جانے کا نہیں تھا۔انہیں یقین ہے کہ جنتادل (ایس) اور آزاد کارپوریٹروں کی حمایت کانگریس کو حاصل رہے گی، رام لنگا ریڈی نے کہاکہ اب جبکہ کانگریس کو جے ڈی ایس کی مدد سے اقتدار مل رہا ہے، کانگریس پارٹی کی طرف سے آزاد کارپوریٹروں کو نظر انداز کرنے کا سوال ہی نہیں اٹھتا۔ انہوں نے کہاکہ جنتادل (ایس) نے ڈپٹی میئر اور چھ اسٹانڈنگ کمیٹیوں کی چیرمین شپ کا دعویٰ کیا ہے، ساتھ ہی حکمران پارٹی کے لیڈرکا عہدہ بھی طلب کیاہے، اس پر اب بھی بات چیت کوقطعیت نہیں مل پائی ہے۔ بتایاجاتا ہے کہ جنتادل (ایس) ڈپٹی میئر، چار اسٹانڈنگ کمیٹیوں کی چیرمین شپ پر اکتفاکرسکتی ہے۔