بنگلور میں ہوئے باڈی بلڈر عرفان کے قتل کے بعد پولس نے کیا پانچ لوگوں کو گرفتار
بنگلور۔28؍نومبر(ایس او نیوز) شہر کے شیواجی نگر پولیس تھانے کی حدود میں آنے والے اولڈ سمٹری روڈ پر نوجوان باڈی بلڈر سید عرفان کے بہیمانہ قتل کی جانچ کرتے ہوئے بنگلور پولیس نے پانچ ملزمین کو گرفتا رکرلیا ہے۔
پولس نے بتایا کہ ملزمین سے پوچھ تاچھ کے بعد معلوم ہوا ہے کہ مکان کی تعمیر اور رقم کا لین دین اس قتل کی بنیادی وجہ ہے۔ ڈپٹی کمشنر آف پولیس راہل کمار شاہپور نے ملزمین کی شناخت برکت احمد عرف بولگنڈ (32) ماگڑی روڈ کے الیاس عرف الو (36) کے جی ہلی کے مبارک عرف ریڈی(32) عربک کالج 17ویں کراس کے شیخ احمد عرف سمیع (31) اور شیواجی نگر کے عرفان شریف عرف عرفان کی حیثیت سے کی ہے۔
بتایاجاتاہے کہ ملزم عرفان شریف مکانوں کی تعمیر کرنے والاکنٹراکٹر ہے۔ مقتول عرفان نے اسے مکان تیار کرنے کا ٹھیکہ دیاتھا اور اس کے لئے 50 لاکھ روپے پیشگی کے طور پر ادا کئے تھے، اس کے علاوہ دس لاکھ روپے بطور قرض دئے تھے۔ کنٹراکٹ حاصل کرنے کے بعد عرفان شریف نے پلان کے مطابق مکان تعمیر کیا اور نہ ہی قرضے کی رقم لوٹائی ، اس پر اپنی ناراضی ظاہر کرتے ہوئے مقتول عرفان نے کنٹراکٹر عرفان کو برا بھلا کہاتھا۔ اور دھمکی دی تھی۔ اس پر انتقام لینے کے لئے عرفان نے اپنے ساتھیوں برکت ، الو، مبارک اور سمیع کو ساتھ لیا اور عرفان کا کام تمام کرنے کا منصوبہ بنایا۔
19نومبر کی رات عرفان اپنی مچھلی کی دکان بند کرنے کے بعد رات گیارہ بجے جوس کی دکان سے گھر لوٹ رہاتھا کہ اولڈ سمٹری روڈ پر ملزمین نے اس پر مہلک ہتھیاروں سے حملے کئے ، تمام کے تمام ہیلمٹ پہنے ہوئے تھے، جس کے سبب کسی کو پہچانا نہیں جاسکا۔ شدید زخمی حالت میں عرفان کو بورنگ اسپتال لے جایا گیا ، جہاں تھوڑی ہی دیر میں عرفان نے دم توڑ دیا ۔ اس سلسلے میں تحقیقات کے لئے شیواجی نگر پولیس تھانے کے انسپکٹر تبریز کی قیادت میں ایک ٹیم تشکیل دی گئی۔ جس نے کارروائی کرتے ہوئے ان ملزمین کو گرفتار کرلیا۔ ٹیم نے عرفان کو مارنے کے لئے استعمال کئے گئے ہتھیارات بھی ضبط کرلئے۔
بتایاجاتاہے کہ ملزم برکت کے جی ہلی اور بنشنکری پولیس تھانہ کی غنڈہ فہرست میں شامل ہے، اور بنشنکری کے مرحوم کارپوریٹر دیوان علی کے قتل میں بھی وہ ایک ملزم رہاہے۔ اس کے علاوہ دوسرا ملزم الو نلمنگلا پولیس تھانے کی حدود میں ہوئے قتل میں ملزم ہے۔ باقی تین ملزمین پر یہ پہلا فوجداری مقدمہ ہے۔ ڈی سی پی نے بتایاکہ ملزمین کو گرفتار کرنے کے لئے قائم ٹیم میں سب انسپکٹر شیلا ، کرائم سے جڑے پولیس جوان سمیع اﷲ اور انور بیگ شامل تھے۔
