حکومت بنگلور کے انفرااسٹرکچر کے سدھار کی پابند: کمار سوامی
بنگلورو،6؍اکتوبر(ایس او نیوز) وزیر اعلیٰ ایچ ڈی کمارسوامی نے کہا ہے کہ ریاستی حکومت شہر بنگلور کو بنیادی انفرااسٹرکچر مہیا کرانے کی پابند ہے، ایک ماہ کے اندر شہر کے پریفرل رنگ روڈ کی تعمیر کا کام شروع کردیا جائے گا۔آج دہلی میں ہندوستان ٹائمز لیڈر شپ سمٹ سے خطاب کے دوران بنگلور کے انفرااسٹرکچر کے متعلق سوالات کا جواب دیتے ہوئے کمار سوامی نے کہاکہ مخلوط حکومت کے قیام کو چار پانچ ماہ کا عرصہ ہی ہوا ہے، اتنے عرصے میں بڑے پیمانے پر تبدیلیاں لانا ممکن نہیں ہے، البتہ اگلے چار پانچ ماہ کے دوران شہر کے انفرااسٹرکچر میں بڑی تبدیلی دیکھنے میں آئے گی، وزیر اعلیٰ نے کہاکہ میٹروریل پراجکٹ پر کام تیزی سے جاری ہے، اور وقت مقررہ پر یہ مکمل ہوگا۔ انہوں نے کہاکہ صرف میٹرو سے ٹریفک کے مسئلے کو قابو میں لانا ممکن نہیں ہے۔ اس کے علاوہ دیگر متبادل ذرائع پر بھی غور وخوض کیا جارہا ہے۔انہوں نے کہاکہ شہر میں بالائی سڑکوں کا ایک نیٹ ورک قائم کرنے کا حکومت منصوبہ رکھتی ہے لیکن مختلف حلقوں سے اس کی مخالفت کی جارہی ہے۔مرکزی حکومت اگر اس منصوبے کو پورا کرنے میں مدد دے تو اسے آگے بڑھایا جاسکتاہے۔ریاستی حکومت کومستحکم قرار دیتے ہوئے کمارسوامی نے کہاکہ کانگریس اور جے ڈی ایس کے درمیان تعلقات انتہائی خوشگوار ہیں۔