اے پی ایم سی انتخابات کے نتائج کانگریس 50اور بی جے پی 42مقام پر قابض
بنگلورو:15؍جنوری(ایس او نیوز ؍صدیق آلدوری) ریاست میں منعقدہ اے پی ایم سی کے نتائج منظر عام پر آگئے ہیں۔ ان انتخابات میں کانگریس اور بی جے پی دونوں ہی پارٹیوں نے ایک دوسرے کو نیچا دکھانے میں کامیابی حاصل کی ہے۔ کانگریس نے جہاں 50؍مقامات پر اکثریت حاصل کی ہے۔ وہیں بی جے پی کو 42؍مقامات پر اکثریت حاصل ہوئی ہے۔ اسمبلی انتخابات سے قبل منعقدہ اے پی ایم سی انتخابی نتائج سے اب بی جے پی کے حوصلے بلند ہوگئے ہیں۔ بی جے پی کے ریاستی صدر بی ایس ایڈی یورپا نے آج اے ایم سی انتخابی نتائج پر تبصرہ کرتے ہوئے کہا ہے کہ ان انتخابات میں بی جے پی نے کانگریس سے برابر کی ٹکرلی ہے اور ان نتائج کے بعد اب بی جے پی کو یہ امید ہے کہ آئندہ ہونے والے اسمبلی انتخابات میں بھی بی جے پی کانگریس سے برابر کی ٹکر لے سکتی ہے۔ انہوں نے دعویٰ کیاہے کہ ان انتخابات سے یہ بات واضح ہونے لگی ہے کہ عوام کا رجحان اب بدل رہاہے۔ وہ کانگریس سے ایک بار پھر دور ہوتے جارہے ہیں۔ برسراقتدار کانگریس پارٹی نے پوری کوشش کے باوجود 50؍جگہوں پر اکثریت حاصل کی ہے۔ جبکہ بی جے پی نے 42؍مقامات پر اکثریت حاصل کی ہے۔ عام انتخابات تک ریاست میں سیاسی ماحول میں اور نئی تبدیلی آسکتی ہے۔ کانگریس کی تائید کردہ صرف 50؍امیدوار ہی کامیاب ہوئے ہیں۔ کئی حلقے جہاں بی جے پی کارکن اسمبلی نہیں ہیں ایسے چند علاقوں میں بی جے پی کی تائید کردہ امیدوار کامیاب ہوئے ہیں ، خصوصاً شمالی کرناٹک، ملناڈ اور ساحلی کرناٹک علاقہ میں بی جے پی کی تائید کردہ امیدوار کامیاب ہوئے ہیں۔ چند علاقوں میں بی جے پی کے امیدوار بہت کم ووٹوں کے فرق سے شکست کھائے ہیں۔ ہاویری، بلگاوی، کورگ، باگل کوٹ، اڈپی، چکمگلور ضلع میں بی جے پی کے تائید کردہ امیدوار بڑی تعداد میں کامیاب ہوئے ہیں۔ چند ایک اے اپی ایم سی میں کانگریس کا ایک بھی نمائندہ کامیاب نہیں ہواہے جس سے صاف ظاہر ہے کہ آئندہ بی جے پی اپنے کانگریس سے پاک کرناٹک بنانے کے عزم کو پورا کرنے والی ہے۔ بنٹوال تعلقہ میں 13؍نشستوں میں بی جے پی کو 7؍نشستیں اور کانگریس کو 6؍نشستیں حاصل ہوئی ہیں۔