بنگلورو: امبیڈنٹ کمپنی دھوکہ دہی معاملہ : سابق وزیر جناردھن ریڈی گرفتار ،14دن عدالتی تحویل میں
بنگلورو:11؍نومبر (ایس او نیوز) امبیڈنٹ کمپنی دھوکہ دہی معاملہ سامنے آتے ہی زیر زمین چلے گئے سابق وزیر جناردھن ریڈی سنیچراپنے وکیلوں کے ساتھ سی سی بی دفتر پہنچے ریڈی کی سی سی بی پولس نے20گھنٹوں سے زائد پوچھ تاچھ کی۔ سی سی بی پولس کی جانچ ٹیم معاملے کو لے کر ثبوت اکھٹا کرنے کے بعد اتوار کو گرفتار کیااور وکٹوریا اسپتال میں صحت جانچ ہونے کے بعد شام کورمنگلا میں موجود فسٹ اے سی ایم ایم عدالت کے منصف جگدیش کےگھر لے جاکر انہیں جج کے سامنے پیش کیاگیا۔ جہاں ریڈی کے وکیلوں کا دعویٰ سماعت کرنے کے بعد منصف نے جناردھن ریڈی کو 24نومبر تک عدالتی تحویل میں بھیج دیا۔ سی سی بی پولس ریڈی کو وہاں سے لے کر مرکزی جیل پرپن اگرہار لے گئی ۔
بااثر ملزم ؟: جناردھن ریڈی کے خلاف دھوکہ دہی (آئی پی سی 420)، ثبوت بربادی (201)اور جرم کی سازش (120بی) الزامات کے تحت کیس درج کرلیا گیا ہے۔ جج کے سامنے سی سی بی جانچ ٹیم کے افسران نے کہاکہ ملزم ایک بااثر شخصیت ہے ، ضمانت منظور کی گئی تو ثبوتوں کو بربادکرنے کا خدشہ ہے ۔ جس کی بنیاد پر جج نے انہیں عدالتی تحویل میں بھیجے جانےکی بات کہی جارہی ہے۔
فرید نے کھولی زبان : امبیڈنٹ کمپنی دھوکہ دہی معاملے میں کمپنی کے مالک ایس اے فرید کے بیان پر انحصار کرتے ہوئے سی سی بی پولس نے ملزم جناردھن ریڈی کو آخر کار گرفتار کرلیا ہے۔ سی سی بی پولس نے معاملے کے اور ایک ملزم برجیش ریڈی کے خاص الخاص کو اپنی تحویل میں لے کر سی سی بی دفتر لے آئے۔ دفتر میں فرید، علی خان اور جنار دھن ریڈی کے روبرو کرتے ہوئے ملزموں کا بیان درج کرلیا۔ روبرو ہوئے بیانات کوتحریری اور وڈیو کیا گیا۔ اسی کی بنیاد پر جناردھن ریڈی کو گرفتار کئے جانے کی بات کہی جارہی ہے۔
اور 2گرفتار:امبیڈنٹ کمپنی دھوکہ دہی معاملے کو لےکر سی سی بی پولس نے اور 2ملزموں کو اپنی تحویل میں لیا ہے۔ سنیچر کی دیر رات ہی ملزمان فیصل اور جئے رام کو تحویل میں لے کر اتوار کو ان سے پوچھ تاچھ کی گئی ۔ ملزم فیصل پر جناردھن ریڈی کے لئے 2 کروڑ روپئے نقدحاصل کرنے اور ملزم جئے رام پر 57کے جی سونا سپلائی کرنے کا الزام ہے۔ کمپنی کے مالک فرید کے بیان کے مطابق فیصل اورجئے رام کو تحویل میں لئے جانےکی بات کہی جارہی ہے۔ جئے رام اور فیصل کے بیانات ہی ریڈی کی گرفتاری کی اہم وجہ بتائے جارہےہیں ۔ کہاجارہاہے کہ معاملے کے 3ملزم امبیڈنٹ کمپنی کا ڈائرکٹر عرفان مرزا کو بھی نوٹس دی گئی تھی جس پر عرفان اتوار کو سی سی بی دفتر پہنچ کر پوچھ تاچھ کے لئے حاضر ہواتھا۔