بنگلورو،27؍مئی(ایس او نیوز) ریاستی وزیر قانون وپارلیمانی امور ٹی بی جئے چندرا نے کہا کہ مرکزی حکومت کی طرف سے انسداد گؤ کشی کے متعلق کل جو قانون لاگو کیاگیا ہے اسے ٹکراؤ کا سبب بننے نہ دیا جائے۔ ہبلی میں عدالت کی ایک نئی عمارت کا جائزہ لینے کے بعد اخباری نمائندوں سے بات چیت کرتے ہوئے انہو ں نے کہاکہ مرکزی حکومت نے قومی سطح پر انسداد گؤ کشی قانون لاگو کیاہے، اس سلسلے میں مرکز نے جو حکمنامہ جاری کیاہے اس کی نقل ابھی کرناٹک حکومت کو نہیں ملی ہے۔کرناٹک میں پہلے ہی انسداد گؤ کشی قانون 1964لاگو ہے۔ پچھلی بی جے پی حکومت نے اس قانون میں ترمیم لانے کی کوشش کی تھی، لیکن اس پر عوامی مزاحمت کو دیکھتے ہوئے موجودہ کانگریس حکومت نے 1964کے قانون کو بحال رکھا ہے۔ انہوں نے کہاکہ ملک میں انسداد گؤ کشی قانون لاگو کرنے کی وکالت جس طریقے سے بابائے قوم مہاتما گاندھی نے کی تھی اسی طرز پر یہ قانون لاگو ہونا چاہئے۔کسی مذہب یا طبقے کے جذبات کو مجروح کرکے اس طرح کا قانون لاگو کرنے اور ٹکراؤ کی صورتحال پیدا کرنے سے یہ معاملہ سلجھنے کی بجائے اور الجھ جائے گا۔