مینگلور: جنوبی کینرا میں بجرنگ دل نے قائم کیا ’گؤ رکھشا دل‘۔ 26جولائی کو احتجاجی ریالی اور جلسۂ عام
منگلورو21؍جولائی (ایس او نیوز) وشوا ہندوپریشد کے لیڈر جگدیش شینؤ نے بجرنگ دل کی نمائندگی کرتے ہوئے ایک پریس کانفرنس کے دوران اعلان کیا کہ گؤ کشی اور مویشی چوری کے واقعات پر روک لگانے کے لئے بجرنگ دل نے جنوبی کینرا میں’گؤ رکھشا دل‘ قائم کرنے کا فیصلہ کیا ہے۔
جگدیش شینؤکے مطابق ’’بہت دنوں سے جنوبی کینرامیں مویشیوں کی چوری عام ہوگئی ہے اور اس میں روز بروز اضافہ ہوتا جارہا ہے۔گزشتہ ایک مہینے کے اندرصرف ایک موڈوشیڈّے نامی علاقے میں ہی 21مویشی چرا لیے گئے ہیں۔اس کے علاوہ الال میں دو اور اتّاور میں مویشی چوری کے دو واقعات ہوگئے ہیں۔موڈے شیڈّو میں مویشی چوروں نے پہریداری کرنے والے کتے کو جان سے مار ڈالنے کے ساتھ گھر کے مالکان کو جان لیوا ہتھیاروں سے دھمکا کر مویشی چرالے گئے۔الال کے موچّیکیری میں واقع ایک ہی گھر سے گزشتہ آٹھ سال کے دوران 15مویشی چرائے گئے ہیں۔اس سے ثابت ہوجاتا ہے کہ ضلع کی پولیس مویشی چوروں پر قابو پانے اور غیر قانونی قصائی خانے بندکرنے میں ناکام ہوگئی ہے۔پولیس کی اسی ناکامی نے ہمیں مویشیوں کی حفاظت کرنے کے لئے ’گؤ رکھشادل‘ قائم کرنے پر مجبور کیا ہے۔‘‘
جگدیش نے یہ بھی کہا کہ ’’ اس سے پہلے ہم نے مویشی چوروں کو رنگے ہاتھوں پکڑنے کی کوشش کی تھی۔مگر میڈیا اور پولیس نے اسے ’مورل پولیسنگ‘ کے برابر قرار دیا تھا۔اس وجہ سے ہم نے یہ کام بند کردیا تھا۔لیکن اب چونکہ صورتحال بد سے بدتر ہوگئی ہے ، اس لئے ہمیں اب پولیس پر بھروسہ نہیں رہا۔اب تو گھروں میں موجود جانوروں کے باڑے سے ہی براہ راست مویشی چرائے جارہے ہیں۔ہلاکت خیز ہتھیاروں کو دکھاکر گھر والوں کو دھمکایا جارہا ہے۔اس لئے فوری اقدام کے طور پر ضلع جنوبی کینرا کے ہر گاؤں میں ایک ’گؤ رکھشادل‘ کی یونٹ ہوگی جس میں15تا 20اراکین ہونگے اور وہ اپنے اپنے علاقے میں گشت اور نگرانی کا کام انجام دیں گے۔‘‘
پریس کانفرنس میں کیے گئے اعلان کے مطابق 26جولائی کو 4بجے موڈے شیڈو سے ضلع میں ہورہی مویشی چوری کے خلاف ایک احتجاجی ریالی نکالی جائے گی اور وامنجور میں جلسۂ عام منعقد کیا جائے گا جس میں3ہزار افراد کے علاوہ ضلع کے تمام اراکین اسمبلی شرکت کریں گے۔ پریس کانفرنس کے موقع پر بجرنگ دل لیڈربھوجنگا کولال، پروین کوتھار، پردیپ کمار اور گوپال کوتھار موجود تھے۔