نئی دہلی19جولائی(ایس او نیوز؍آئی این ایس انڈیا) ہندوستانی عازمین حج کی روانگی کا سلسلہ شروع ہوگیا ہے۔ پہلا قافلہ روانہ ہوگیا ہے اور اب روزانہ بڑی تعداد میں عازمین روانہ ہوں گے۔ تاہم پہلے قافلہ میں ایک ایک ڈھائی سال کا بچہ اندرا گاندھی انٹرنیشنل ایئر پورٹ ٹرمنل -2 پر لوگوں کی توجہ کا مرکز بن گیا۔ ڈھائی سال کا ننھا اور معصوم بچہ انس بھی زیارت بیت اللہ کیلئے روانہ ہوا۔

اترپردیش کے میرٹھ کے ڈھائی سال کا بچہ انس بن محمد عالم اپنے والدین کے ساتھ سفر حج پر روانہ ہوئے۔ یہ ننھا بچہ جس سے نمائندوں  کی ٹیم نے بات کی۔ جس میں اس بچے نے کہا کہ حج کے لئے جارہا ہوں، بہت اچھا لگ رہا ہے۔ اس ننھے سے بچے کے والدین انتہائی خوش نظر آرہے تھے۔

انس کے والد محمد عالم نے بتایا کہ میں نے پہلی بار سفر حج کے لئے درخواست دی تھی اور پہلی بار میں ہی مجھے منظوری مل گئی، اس لئے میں سمجھتا ہوں کہ میرے لئے سعادت کی بات ہے۔ انہوں نے کہا کہ مجھے اللہ نے اپنے گھر بلالیا ہے اوراب ہم جارہے ہیں۔ انس کی والدہ نے بتایا کہ مجھے بہت خوشی محسوس ہورہی ہے کہ میرا چھوٹا بچہ میرے ساتھ جارہا ہے۔ انہوں نے کہا کہ ہمیں وہاں بچے کو سنبھالنے میں کسی طرح کی کوئی پریشانی نہیں ہوگی۔ انس کی والدہ نے یہ بھی کہا کہ ہم تو دعا کریں گے کہ سب اپنے اپنے بچوں کے ساتھ زیارت بیت اللہ کیلئے جائیں۔

واضح رہے کہ بیت اللہ کا حج ارکان اسلام میں سے ایک رکن اور اسلام کی فرائض میں سے ہے۔ اسلام کی بنیاد پانچ اشیا (چیزوں) پر ہے، جس میں ایک بیت اللہ کا حج کرنا بھی ہے۔ یعنی اگر اللہ نے استطاعت دی ہے، تو حج کرنا ہرمسلمان پر فرض ہے۔ اسی طرح حدیث میں آتا ہے کہ جس نے حج بیت اللہ کیا اوراس کے بعد اس نے کوئی گناہ نہیں کیا اور خود کو گناہوں سے محفوظ رکھا تو اس پر جنت لازم ہے۔