بکل نواب نے دیا شیعہ وقف بورڈ سے استعفی
نئی دہلی،10؍ ستمبر (ایس او نیوز؍آئی این ایس انڈیا) اتر پردیش شیعہ سینٹرل وقف بورڈ کے ممبر مظہر علی خاں عرف بکل نواب نے آج بورڈ کی رکنیت سے استعفیٰ دے دی ہے۔انہوں نے چیف سکریٹری (اقلیتی امور) کو لکھے خط میں یہ اطلاع دی ہے۔ جبکہ شیعہ سینٹرل وقف بورڈ نے آج ہی ایک خط چیف سکریٹری اقلیتی امور کو لکھ کر کہا ہے کہ بکل نواب 27-07-2017کو اتر پردیش قانون ساز کونسل کی رکنیت سے استعفیٰ دے دیا تھا۔اس لئے اسی دن قانونی طور سے ان کی وقف بورڈ سے رکنیت ختم ہو گئی تھی۔معلوم ہو کہ آج کل اتر پردیش شیعہ سینٹرول وقف بورڈ کے چیئر مین وسیم رضوی کو لے کر شیعہ برادری میں کافی غصہ پایا جا رہا ہے ۔ایران سے ان کے خلاف ایک فتویٰ منگایا گیا ہے جس میں رضوی کو اسلام سے خارج بتایا گیا ہے ۔اس کے علاوہ شیعہ عالم دین مولانا کلب جواد نے گزشتہ دنوں اپنے جمعہ کے خطبے میں وسیم رضوی کو اسلام سے خارج کئے جانے کا اعلان کیا ہے ۔ اسی بیچ آج نواب بکل نے بھی بورڈ کی رکنیت سے استعفیٰ دینے کا اعلان کرتے ہوئے حکومت اتر پردیش سے بورڈ کو تحلیل کرنے کا مطالبہ کیا ہے ۔جبکہ بورڈ نے بکل نواب کی شیعہ سینٹرل وقف بورڈ کے رکن ہونے پر ہی سوال کھڑے کئے ہیں۔