نئی دہلی:30/ جنوری (ایس اونیوز /آئی این ایس انڈیا)ملک نے بدھ کو بابائے قوم مہاتما گاندھی کی 71 ویں برسی پر انہیں خراج عقیدت پیش کیا اور صدر جمہوریہ ، نائب صدرجمہوریہ اور وزیر اعظم اور حزب اختلاف کے لیڈر راہل گاندھی نے مہاتماگاندھی کو خراج عقیدت پیش کیا۔ راج گھاٹ پر باپو کے مزارپر صبح خراج تحسین اور’پراتھنا سبھا ‘کا انعقاد کیا گیا تھا۔ یہاں صدر جمہوریہ، نائب صدر جمہوریہ اور وزیر اعظم نے باپو کوخراج عقیدت پیش کیا ۔اس موقع پر وزیر دفاع نرملا سیتا رمن، شہری ہاؤسنگ وزیر ہردیپ پوری، کانگریس صدر راہل گاندھی اور دیگر معزز لوگوں نے بھی مہاتما گاندھی کوخراع عقیدت پیش کیا۔مہاتما گاندھی کو خراج عقیدت پیش کرتے ہوئے صدرجمہوریہ نے اپنے ٹوئٹ میں کہا کہ :’یومِ شہادت پر ہم مہاتما گاندھی اور ان گنت مجاہدین آزادی کو عقیدت و محبت کے ساتھ یاد کرتے ہیں جنہوں نے ہماری آزادی کے لئے اپنا سب کچھ نچھاور کر دیا‘۔ نائب صدرجمہوریہ نے بابائے قوم مہاتما گاندھی کی برسی پر راج گھاٹ جا کر انہیں خراج عقیدت پیش کیا۔ انہوں نے ٹوئٹ کیا کہ گاندھی جی سچ اور عدم تشدد کے لازوال اقدارکے علمبردار تھے ۔ ان کی تمام زندگی ہی انسانیت کے لیے وقف تھی ۔ وہ تمام انسانیت کے لئے مشعل راہ ہیں ۔ نائیڈو نے ٹوئٹ کیا کہ آج بھی ان کے افکار و خیالات دنیا میں نئے چیلنجز سے نمٹنے کے لیے مشعل راہ ہیں ۔ان کی عظیم خدمات نے دنیا کے کئی عظیم رہنماؤں کو ترغیب دی۔ وزیر اعظم نے مہاتما گاندھی کو خراج عقیدت پیش کرتے ہوئے کہاکہ بابائے قوم کو ان کی برسی پردل سے خراج عقیدت ۔ ہم ان کے بتلائے ہوئے راستے اور ان کے افکار پر چلنے کے عزم کا اظہار کرتے ہیں۔ مودی نے کہا کہ ہم ان تمام شہیدوں کو خراج عقیدت پیش کرتے ہیں،جنہوں نے ملک کے لیے قربانی دی۔ یہ ملک ان کی خدمت اور قربانی کے تئیں ہمیشہ مشکور رہے گا۔ بی جے پی صدر امت شاہ نے مہاتما گاندھی کو خراج عقیدت پیش کرتے ہوئے کہا کہ تمام دنیا کو سچ اور عدم تشدد کا درس دینے والے بابائے قوم مہاتما گاندھی کی برسی پر انہیں خراج عقیدت ۔