بنگلورو۔16؍جنوری(ایس او نیوز) مرکزی وزیر برائے منصوبہ بندی ڈی وی سدانند گوڈا نے کہاکہ ریاستی بی جے پی میں پارٹی صدر یڈیورپا اور کونسل کے اپوزیشن لیڈر کے ایس ایشورپا کے درمیان شدید اختلافات کے نتیجہ میں کرناٹک میں پارٹی کی ساکھ بری طرح متاثر ہوئی ہے۔ پارٹی کارکنوں میں اس وجہ سے انتشار کی کیفیت پائی جارہی ہے،جسے ختم کرنے کی ضرورت ہے۔ سدانند گوڈا نے کہاکہ ایسے وقت میں جبکہ ریاست میں پارٹی مضبوط ہورہی تھی، دو لیڈروں کے درمیان اس طرح کی بیان بازیوں سے پارٹی پر اعتماد کرنے والوں کو ٹھیس پہنچے گی۔ انہوں نے کہاکہ پارٹی میں ریاست میں جو بھی حالات ہیں اس سے اعلیٰ کمان کو واقف کرایا گیا ہے، اعلیٰ کمان کی طرف سے صرف اس معاملے کو سلجھانے کی یقین دہانی ہی نہیں کرائی گئی، بلکہ مصالحت کی کوشش بھی ہوئی ہے، لیکن اس میں ابھی پیش رفت نہیں ہوپائی ہے۔ انہوں نے کہاکہ ریاستی عوام نے بی جے پی سے بہت سی امیدیں وابستہ رکھی ہیں اس مرحلے میں اگر دو لیڈر آپس میں جھگڑ پڑیں تو اس پارٹی کو نقصان پہنچے گا۔ سدانند گوڈا نے مشورہ دیا کہ دونوں لیڈران مل کر پارٹی کیلئے کام کریں۔ انہوں نے کہاکہ پارٹی کی قومی قیادت کے علم میں بھی یہ واقعات لائے گئے ہیں، لیکن وہ فی الوقت پانچ ریاستوں کے اسمبلی انتخابات کی تیاریوں میں مصروف ہے۔