ممبئی،22؍مارچ(ایس او نیوز؍آئی این ا یس انڈیا)آسٹریلیا کے تیز بالر شان ٹیٹ کو ہندوستان کی شہریت مل گئی ہے۔ ٹیٹ کا ہندوستان سے کافی گہرا ناطہ رہا ہے۔ شان ٹیٹ ہند نڑاد ماڈل ماشما سنگھا کے شوہر ہیں اور ہندوستان میں ان کی سسرال بھی ہے۔ہندوستان کی شہریت ملنے کی معلومات آسٹریلیائی فاسٹ بولر شان ٹیٹ نے ایک ٹوئٹ کر کے دی۔شان ٹیٹ نے اپنا آخری ون ڈے میچ ہندوستان کے خلاف ورلڈ کپ 2011 کے کوارٹر فائنل میں کھیلا تھا۔ یہ وہی بالر ہے، جن کی آگ اگلتی اور تیز رفتار سے آتی گیندوں کے سامنے بلے بازوں کو کافی مشکل ہوتی تھی۔شان ٹیٹ نے ورلڈ کپ 2011 کے بعد ون ڈے اور ٹیسٹ کرکٹ سے سبکدوشی اختیارکرلی تھی اور اب وہ صرف ٹی 20 کرکٹ ہی کھیلتے ہیں۔ شان ٹیٹ نے آسٹریلیا کی ٹیم کے لئے 35 ون ڈے، 21 ٹی 20 اور 3 ٹیسٹ کھیلے ہیں۔شان ٹیٹ بین الاقوامی کرکٹ میں سب سے تیز گیند پھینکنے والے دوسرے بالر ہیں۔ 2010 میں انگلینڈ کے خلاف شان ٹیٹ نے 161.1فی گھنٹے کی رفتار سے گیند ڈال کر سب کو چونکا دیا تھا۔شان ٹیٹ نے سال 2005 میں بین الاقوامی کرکٹ میں ڈبیوکیا تھا لیکن ان کا بین الاقوامی کیریئر زیادہ بڑا نہیں رہا، اب جب شان ٹیٹ کو مہاجرہندوستانی شہری کارڈ مل گیا ہے، تو وہ ہندوستانی کے شہری بن گئے ہیں۔ اس کارڈ کے ذریعے شان ٹیٹ ہندوستان میں ہونے والے انتخابات میں بھی حصہ لے سکتے ہیں۔