ممبئی،8؍ جون(ایس او نیوز؍پریس ریلیز) مہاراشٹر میں ہوئے ایک دہشت گردانہ واقعہ بنام اورنگ آباد اسلحہ ضبطی معاملے میں ریاستی حکومت کی جانب سے ملزمین کے خلاف داخل کی گئی اپیل کو آج ممبئی ہائی کورٹ کی دو رکنی بینچ نے سماعت کے لیئے قبول کرلیاجس سے اس مقدمہ سے باعزت بری ہوئے ملزمین سمیت دیگر ملزمین کو شدید دھچکہ لگا ۔

موصولہ اطلاعات کے مطابق ریاستی حکومت (انسداد دہشت گرد دستہ) نے خصوصی مکوکا عدالت کے ا س فیصلہ کے خلاف اپیل داخل کی ہے جسمیں عدالت نے ا س معاملے کا سامنا کررہے 20؍ مسلم نوجوانوں میں سے8؍ مسلم نوجوانوں کو باعزت بری کردیا تھا جبکہ 3؍ نوجوانوں کو آٹھ سال ، 2؍ نوجوانو ں کو 14؍ سال قید بامشقت کی سزا اور دیگر 7؍ نوجوانوں کو عمر قید کی سزا سنائی تھی۔

60؍ صفحات پر مشتمل عرضداشت میں ریاستی حکومت نے ہائی کورٹ کے حسٹس گوئی اور جسٹس کوتوال کو بتایا کہ ملزمین پر مکوکا قانون کے تحت مقدمہ قائم کیا گیا تھا اور ثبوت و شواہد کی روشنی میں انہیں سزائیں بھی مکوکا قانون کے تحت ہی ملنا چاہئے تھی لیکن خصوصی مکوکا عدالت کے جج شریکانت انیکر نے اپنے فیصلہ میں ملزمین پر مکوکا قانون کے اطلاق کو غلط ٹہراتے ہوئے اپنا فیصلہ صادر کیا تھا جس کی وجہ سے بیشتر ملزمین کو راحت ملی تھی ۔

اسی درمیان ملزمین کو قانون امداد فراہم کرنے والی تنظیم جمعیۃ علماء مہاراشٹر(ارشد مدنی)قانونی امداد کمیٹی کے سربراہ گلزار اعظمی نے ممبئی میں اخبار نویسوں کو بتایا کہ حکومت کی جانب سے داخل کی گئی اپیل کاجواب دینے کے لیئے وہ تیار ہیں اور اس تعلق سے عدالت میں نمائندگی کی گئی ہے نیز ملزمین کے دفاع میں آج سینئر وکیل آباد فونڈا، ایڈوکیٹ شریف شیخ، ایڈوکیٹ انصار تنبولی ودیگر موجود تھے جنہوں نے عدالت سے گذارش کی کہ معاملے کی جلد از جلد سماعت کی جائے کیونکہ ۱۴؍ سال کی سزا پانے والے ملزمین ڈاکٹر محمدشریف اور مظفر تنویر کی ضمانت عرضداشتیں زیر سماعت ہیں ۔ 

دفاعی وکلاء کے شدید اسرار کے باجود دو رکنی بینچ نے ملزمین کی ضمانت عرضداشت پر سماعت کرنے سے معذرت کرلی اور معاملے کی سماعت دو ہفتوں کے لیئے ملتوی کردی۔آج متذکرہ ملزمین کی ضمانت عرضداشت پر بحث ہونے والی تھی لیکن استغاثہ نے عدالت پر دباؤ بنایا کہ وہ پہلے ملزمین کے خلاف داخل کی گئی اپیل کی سماعت کرے کیونکہ نچلی عدالت نے فیصلہ غلط دیا ہے اور ملزمین کو مکوکا قانونی کی بجائے تعزیرات ہند اور دیگر قوانین کے تحت سزا سنائی ہے ۔ 

ریاستی حکومت نے ملزمین محمد عامر شکیل احمد شیخ، سید زبیر سید انور قادری،محمد مظفر محمد تنویر،عبدالعظیم عبدالجمیل شیخ، مشتاق احمد محمد اسحاق، افضل خان نبی خان، ریاض احمد محمد رمضان،ڈاکٹر محمد شریف شبیر احمد، بلال احمد عبدالزاق، سید عاکف سید ظفر الدین، خطیب عمران عقیل احمد، شیخ وقار شیخ نثار، افروز خان شاہد خان پٹھان، محمد صمد شمشیرخان، محمد عقیل محمد اسماعیل مومن، فیصل عطاالرحمن شیخؒ ، محمد اسلم حاجی محمد لطیف اورسید ذبیح الدین کے خلاف اپیل داخل کی ہے اور آج ہائی کورٹ نے اس تعلق سے ملزمین کو نوٹس بھی جاری کیا ہے۔

واضح رہے کہ ریاستی حکومت نے خصوصی مکوکا عدالت کے اس فیصلہ کے خلاف اپیل داخل کی ہے جسمیں اس نے ملزمین کو مکوکا قانون کی بجائے دیگر قوانین کے تحت سزائیں سنائی تھیں اور چند ملزمین کو باعزت بری بھی کردیا تھا ۔