سوامی اگنی ویش جیسی شخصیت پر حملہ سنگین ،کیوں خاموش ہیں وزیر اعظم :ملی کونسل
نئی دہلی:19/جولائی(ایس او نیوز /ٓئی این ایس انڈیا)سوامی اگنی ویش ایک بین الاقوامی اسکالر ،معروف مذہبی رہنما اور عظیم سماجی کارکن ہیں ،ان جیسی شخصیت پرحملہ ہونا یہ بتاتاہے کہ ملک میں نفرت اور انتہاء پسندی کی جڑیں بہت گہری ہوچکی ہیں اور حکومت اس کی پشت پناہی کررہی ہے ۔ان خیالات کا اظہار آل انڈیا ملی کونسل کے جنرل سکریٹری ڈاکٹر محمد منظور عالم نے ایک پریس ریلیز میں کیا ۔انہوں نے مزید کہاکہ سوامی اگنی ویش جیسی شخصیت پر حملہ ہونے کے باوجود وزیر اعظم خامو ش ہیں،وزیر داخلہ کی طرف سے کوئی مذمتی بیان نہیں آیاہے ،حکومت کے کسی فرد نے اس واقعہ پر افسوس کا اظہار نہیں کیا ہے اس کے برعکس ایک بی جے پی وزیر اعلی منتازع بیان دیتاہوئے کہاہے کہ یہ حملہ منصوبہ بند تھا اور سوامی جی نے خود اپنی شہرت کیلئے کرایاتھا ۔ڈاکٹر محمد منظور عالم نے کہاکہ سوامی اگنی ویش پر حملہ کرنے والے سبھی بی جے پی کارکنان تھے ،اب تک کسی کی گرفتاری نہیں ہوئی ہے اور نہ ہی پارٹی اور حکومت کے کسی ذمہ دار فرد نے اس کی مذمت کی ہے جس سے معلوم ہورہاہے کہ انتہاء پسندی اور فرقہ پرستی کو خود حکومت فروغ دے رہی ہے ۔سوامی اگنی ویش جیسے لوگوں پر حملہ ہونے کے بعد یہ بھی صاف ہوگیاہے کہ جب اتنے بڑے آدمی محفو ظ نہیں ہیں تو ایک عام کیسے محفوظ رہ سکتاہے اور کس طرح بے خوف ہوکر رہ سکتاہے ۔