کنداپور 10؍اپریل (ایس او نیوز) کنداپور کے ایک مضافاتی علاقے انکڈادکٹّے میں واقع ایک ہوٹل میں انتخابی ضابطۂ اخلاق کی خلاف ورزی کرتے ہوئے شراب فروخت کیے جانے کی شکایت موصول ہونے پر جب افسران وہاں پہنچے تو مبینہ طور پر گاہک اور ہوٹل کے مالک نے افسران کو اپنی ڈیوٹی انجام دینے سے روک دیا  اور ان پر حملے کی کوشش کی گئی۔

اس اسمبلی حلقے کے انتخابی افسر اسسٹنٹ کمشنر بھو بالن، پروبیشنری اسسٹنٹ کمشنر پوویتا اور ایکسائز ڈپٹی کمشنر نیرو نندن نے جب رات کے وقت مذکورہ ہوٹل کا دورہ کیا تو وہاں کچھ لوگ شراب پی رہے تھے۔ انتخابی افسران نے جب اس کی ویڈیو فوٹیج کے لئے ریکارڈنگ شروع کی تو وہاں پر موجود ایک گاہک ان سے الجھ پڑا اور جھگڑے پر آمادہ ہوگیا ۔ انتخابی افسران کا کہنا ہے کہ اس بیچ ان پر حملہ کرنے کی بھی کوشش کی گئی۔

اسسٹنٹ کمشنر کی شکایت پر پولیس نے انتخابی ضابطۂ اخلاق لاگو کرنے والے افسران کی راہ میں رکاوٹ پید اکرنے اور ان پر حملہ کرنے کا کیس درج کیا ہے اورہوٹل کے مالک اور مذکورہ گاہک کو گرفتار کرلیا ہے۔