کووند ،مودی ،پرنب ،منموہن ،سونیا نے واجپئی کو خراج عقیدت پیش کیا
نئی دہلی ،17؍اگست(ایس او نیوز؍آئی این ایس انڈیا)صدر جمہوریہ رام ناتھ کووند،وزیراعظم نریندرمودی ،سابق صدرجمہوریہ پرنب مکھرجی ،سابق وزیراعظم منموہن سنگھ ،سابق نائب وزیراعظم لال کرشن اڈوانی ،ترقی پسند اتحاد کی چیئرپرسن سونیاگاندھی ،مرکزی وزیرداخلہ راج ناتھ سنگھ ،وزیرخارجہ سشما سوراج ،کئی وزرائے اعلی ،رہنماؤں اور سرکردہ شخصیات نے سابق وزیراعظم اٹل بہاری واجپئی کے جسدخاکی پر گلہائے عقیدت پیش کئے ۔
مسٹر واجپئی کا جمعرات کی شام ایمس میں انتقال ہوگیا۔انکا جسدخاکی لوگوں کے دیدار کے لئے انکی سرکاری رہائش گاہ 6،کرشن مینن مارگ پر رکھاگیاہے جہاں انھیں خراج عقیدت پیش کرنے والوں کی قطاریں لگی ہوئی ہیں ۔
مسٹر مودی نے انکے جسد خاکی پر گلہائے عقیدت پیش کرکے سرجھکاکر انھیں خراج عقیدت پیش کیا۔
بی جے پی کے سینئر لیڈر ان مرلی منوہر جوشی ،سابق مرکزی وزیر یشونت سنہا اور مسٹر کلراج مشر نے بھی مسٹر واجپئی کو خراج عقیدت پیش کیا۔
بہار کے وزیراعلی نتیش کمار ،مغربی بنگال کی وزیراعلی ممتابنرجی ،اڈیشہ کے وزیراعلی نوین پٹنائک ،آسام کے وزیراعلی سربانندسونوال نے بھی مسٹر واجپئی کو گلہائے عقیدت پیش کئے ۔
